ᖁᕕᐊᓲᑎᖃᕐᐳᒍᑦ ᑐᖕᖓᓱᑦᑎᓯᒋᐊᖅ ᒫᓯᐅ ᐱᐊᕆᒥᒃ, ᑎᐊᕆ ᓕᔩᒥᒃ ᑳᓴᓐ ᑕᒍᕐᓇᒥᓪᓗ ᑕᕐᖁᑎᐅᑉ ᐱᓇᓱᑦᑎᖏᓐᓄᑦ ᐃᓚᐅᓂᐊᓕᕐᑎᓗᒋᑦ! ᐊᑐᓂ ᑖᒃᑯᐊ ᖃᐅᔨᒪᒍᓯᕆᔭᕐᒥᓄᑦ ᓱᖑᓰᒋᐊᓚᖓᕗᑦ ᑎᓕᔭᐅᒪᐅᑎᑦᑎᓂᒃ ᓱᑲᓯᐅᒥᑎᑦᓯᒐᓱᐊᕐᑎᓗᑕ ᓄᓇᓕᒻᒧᑦ ᓯᕗᓕᕐᑕᐅᔪᓂᒃ ᓴᓗᒪᔪᒃᑯᑦ ᐃᑯᒪᓕᐅᕋᓱᐊᕐᓂᐅᓱᑎᒃ ᓄᓇᕕᒻᒥ.
ᒫᓯᐅ ᐱᐊᕆ ᑮᓇᐅᔭᓕᕆᓂᕐᒥᒃ ᐱᓇᓱᐊᕐᑐᖅ. ᐃᓕᑕᕆᔭᐅᒍᑎᖃᕐᓱᓂ ᑮᓇᐅᔭᓕᕆᔨᐅᓂᕐᒥᒃ ᐱᓇᓱᐊᕐᓯᒪᓕᕐᑐᖅ 20-ᑲᓵᓂᒃ ᐊᕐᕌᒍᓂᒃ ᑭᓇᐅᔦᑦ ᑐᓴᐅᒪᔭᐅᒍᑎᒋᒋᐊᓕᖏᓐᓂᒃ ᑖᒃᓯᓗ ᐸᕐᓇᑕᐅᒍᑎᒋᒋᐊᓕᖕᖏᓐᓂᒃ ᐱᓇᓱᐊᕐᐸᓱᓂ, ᒫᓯᐅ ᓲᖑᔪᒻᒪᕆᒻᒥᒃ ᐱᓇᓱᐊᓯᒪᓂᓕᒃ ᑕᒻᒪᓯᒪᔪᕐᓯᐅᑎᐅᓂᒃᑯᑦ ᐊᔪᖀᒋᐊᕐᑎᐅᓂᒃᑯᓗ ᐱᑦᔪᔨᓂᐅᔪᓂ. ᐃᓚᐅᓯᓂᖓ ᐃᑲᔪᕐᓯᓚᖓᔪᖅ ᑕᕐᖁᑎᐅᑉ ᐱᕈᕐᐸᓕᐊᓂᖓᓂᒃ ᑭᖕᖑᒪᑦᓯᓂᖓᓂᓪᓗ ᐱᓇᓱᐊᕐᕕᒥᑕ ᐃᓗᐊᒍᑦ ᐊᐅᓚᑦᓯᓂᓕᕆᔨᖃᕆᐊᖃᕐᓂᒥᒃ ᑐᓴᐅᒪᔭᐅᑎᑦᓯᒋᐊᖃᕐᓂᒥᓪᓗ.
ᑎᐊᕆ ᓕᔩ ᐅᕙᑦᑎᓄ ᐃᓚᐅᓯᒻᒥᔪᖅ ᐊᐅᓚᑦᓯᔨᒻᒪᕆᐅᓚᖓᑦᓱᓂ ᐊᓄᕆᒧᑦ ᐃᑯᒪᓕᐅᕐᓂᐅᑉ ᐱᓇᓱᐊᕐᑕᐅᓂᖓᓂᒃ. ᐊᕐᕋᒍᐃᑦ 20 ᐅᖓᑖᓄᑦ ᐱᓇᓱᐊᕐᓯᒪᓂᖃᓕᕐᑐᖅ ᓄᑕᐅᓯᓕᑎᕈᓐᓇᑐᑦ ᐃᑯᒪᓕᐅᕈᑕᐅᒍᓯᖏᓐᓂ, ᐃᓚᖃᕐᑎᓗᒋᑦ ᓯᕗᓕᖃᑦᑕᓯᒪᓂᕐᒥᒃ General Electric-ᑯᓐᓂ (GE) ᐱᓇᓱᐊᕐᓱᓂ, ᑎᐊᕆ ᐊᐅᓚᑦᓯᖃᑦᑕᓯᒪᓕᕐᑐᖅ ᑲᔪᓯᑎᑕᐅᓂᖓᓂᒃ 40-ᓂᒃ ᐊᓄᕆᒧᑦ ᐱᓇᓱᐊᕐᓂᒪᕆᐅᔪᓂᒃ ᑲᓇᑕᒥ ᐊᒥᐊᔨᑲᓂᓗ ᐊᒻᒪᓗ ᐊᐅᓚᑦᓯᓂᕐᒥᒃ ᓴᓇᒪᒋᐊᖃᕐᑐᓕᕆᓂᕐᒥᓗ ᑲᒪᔨᐅᓯᒪᑦᓱᓂ ᑲᓇᑕᒥ, GE-ᑯᓂ. ᐱᓪᓗᑯᒋᐊᖃᕐᑐᓕᕆᓂᕐᑎᒍᑦ ᖃᐅᔨᒪᔪᒻᒪᕆᐅᓂᖓ ᐱᓇᓱᐊᕐᑕᐅᔪᓂᓪᓗ ᓯᕗᓕᕈᓐᓇᓂᖓ ᐱᒻᒪᕆᐅᓚᖓᔪᖅ ᐊᑐᐃᓐᓇᕈᕐᑎᓕᕐᑎᓗᑕ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕈᑎᓕᐅᕐᓂᒥᒃ ᓴᓇᓂᖃᕐᓂᐊᓕᕐᑎᓗᑕ ᖁᐊᕐᑕᒥ ᐳᕕᕐᓂᑐᒥᓗ. ᑎᐊᕆ ᐃᓚᒋᔭᐅᔪᖅ ᑯᐯᑉᒥ ᓴᓇᔨᒻᒪᕆᐅᓂᕐᒧᑦ ᐃᓕᑕᕐᓯᔭᐅᒪᔪᓄᑦ Ordre des ingénieurs du Québec-ᒧᑦ
ᑳᓴᓐ ᑕᒍᕐᓇᖅ ᐃᓚᒋᓂᐊᓕᕐᒥᔭᕗᑦ ᑐᓴᕋᑦᓴᓕᕆᓂᕐᒥᒃ ᑲᒪᔨᐅᓗᓂ. ᒪᑭᕝᕕᑯᓐᓂᒃ ᑲᒪᔨᐅᓯᒪᔪᖅ ᑐᓴᕐᕋᑦᓴᓕᕆᓂᕐᒥᒃ, ᑳᓴᓐ ᓯᕗᓕᕐᓯᒪᔪᖅ ᐱᕙᓪᓕᐊᑎᑦᓯᖃᑎᐅᑦᓱᓂ ᓄᑖᖑᓂᕐᐹᑎᒍᑦ ᑐᓴᐅᒪᑎᑦᓯᒍᑎᖃᕐᓂᒧᑦ ᐊᐅᓚᑦᔭᕆᐊᕈᑕᐅᔪᓂᒃ ᓲᖑᓯᒋᐊᕐᑎᓯᒍᑎᐅᓯᒪᔪᓂᒃ ᓄᓇᓖᑦ ᑐᓴᐅᒪᑦᓯᐊᕆᐊᖃᕐᓂᖓᓂᒃ ᑎᒥᐅᔪᓪᓗ ᑐᓴᐅᒪᔭᐅᒋᐊᖃᕐᓂᖓᓂᒃ. ᐱᓇᓱᐊᕐᓯᒪᓂᖓ ᐃᑲᔪᕐᓯᓚᖓᔪᖅ ᑕᕐᖁᑎᐅᑉ ᓂᐱᖓᓂ ᑐᓴᕐᓴᐅᒋᐊᓪᓚᑎᑦᓯᓗᓂ ᑐᓴᐅᒪᔭᐅᑎᑦᓯᓗᓂᓗ ᐊᐅᓚᑦᔭᕆᐊᕈᑎᒋᕙᓐᓂᐊᑕᑦᑎᓂᒃ ᓄᓇᕕᐅᑉ ᓄᓇᓕᖏᓐᓂ.
ᐊᓕᐊᓲᑎᖃᒻᒪᕆᑉᐳᒍᑦ ᐱᓇᓱᐊᖃᑎᖃᓚᖓᒋᐊᖅ ᒫᓯᐅᒥᒃ, ᑎᐊᕆᒥᒃ ᑳᓴᓐᒥᓗ ᐱᕈᕐᓭᒐᓱᐊᖏᓐᓇᓂᕐᑎᒍᑦ ᐊᓯᕐᕿᖏᑦᑐᒥᒃ ᓯᕗᓂᖃᕋᓱᐊᕐᓂᒥᒃ ᓄᓇᕕᒻᒥ- ᐊᑕᐅᑦᓯᑯᑦ ᐱᓇᓱᐊᕐᓗᑕ.