ᓯᑎᒻᐱᕆ ᐱᒋᐊᕐᖃᒥᐅᑎᓪᓗᒍ, ᐊᒥᓱᒐᓓᑦ ᐃᓄᐃᑦ ᐳᕕᕐᓂᑐᒥᐅᑦ ᖁᐊᕐᑕᒥᐅᓪᓗ ᑲᔅᐲᓕᐊᓚᐅᔪᑦ ᑕᑯᓂᐊᕐᓱᑎᒃ ᐊᓄᕆᒧᑦ ᐃᑯᒪᓕᐅᕈᑕᐅᔪᓂᒃ. ᑖᓐᓇ ᑐᖓᓕᕆᔭᐅᔪᖅ ᑕᕐᖁᑎᐅᑉ ᓄᑕᐅᓯᓕᑎᕈᓐᓇᑐᓂᒃ ᐃᑯᒪᓕᐅᕐᓂᒥᒃ ᕿᒥᕐᕈᑎᑦᓯᓂᖓᓄᑦ, ᑕᒃᑯᒧᑦ ᖃᐅᔨᓇᓱᐊᕐᑎᓯᓂᖅ ᓄᓇᕕᒻᒥᐅᓂᒃ ᐱᓇᓱᒍᑕᐅᒍᓐᓇᓕᕐᑐᓂᒃ ᐃᓄᓐᓂᓗ ᐃᓂᓪᓚᑎᕆᓕᕐᑐᓂᒃ ᓯᕗᓂᕐᒥ ᐊᓯᕐᕿᖏᓐᓂᓴᒥᒃ ᐃᑯᒪᓕᐅᕈᑎᖃᕈᓐᓇᓂᕐᒥᒃ ᑯᐯᒻᒥ.
ᑲᔅᐲᒧᑦ ᑎᑭᑐᑦ: ᓂᕆᑎᑕᐅᔪᑦ
ᑲᔅᐲᓕᐊᕐᓂᖅ ᐱᒋᐊᕈᑎᖃᓚᐅᔪᖅ ᓂᕆᑎᑕᐅᓂᕐᒥᒃ, ᐃᓚᐅᔪᓕᒫᑦ ᑲᑎᖃᑎᒋᓚᐅᔪᑦ, ᓱᓇᓱᐊᕐᓂᐅᓂᐊᕐᑐᓂᓪᓗ ᐱᓇᓱᐊᕈᓯᕐᒥ ᑐᑭᓯᑎᑕᐅᑦᓱᑎᒃ, ᐅᖃᐅᓯᕆᔭᐅᔪᓂᓪᓗ ᑐᓵᕐᑎᑕᐅᑦᓱᑎᒃ. ᔮᓂ ᐅᕝᕙᐅᑦ, ᓲᓱᒋᔭᐅᓂᖃᑦᓯᐊᑐᖅ ᖁᐊᕐᑕᒥᐅᖅ ᐅᖃᐅᓯᖃᓚᐅᔪᖅ ᓲᖑᔪᒻᒪᕆᓐᓂᒃ ᐃᓄᐃᑦ ᖃᓄᐃᑦᑐᑰᕐᓯᒪᓂᖏᓐᓂᒃ ᖃᓄᕐᓗ ᓱᑲᑦᑐᒥᒃ ᐊᓯᑦᔨᓯᒪᓕᕐᓂᖓᓂᒃ ᓄᓇᕕᐅᑉ. ᐅᖃᐅᓯᖃᓚᐅᔪᖅ ᖃᓄᖅ ᐃᓄᐃᑦ ᐃᓅᓯᒪᓂᖓᓂᒃ ᓄᓇᕕᒻᒥᐅᖑᑦᓱᑎᒃ ᐊᕐᕌᒍᐃ 3,800 ᐅᖓᑖᓄ ᐊᒻᒪᓗ 100 ᐊᕐᕋᒍᐃᑦ ᐊᓂᒍᕐᓯᒪᓕᕐᑐᑦ ᓱᑲᑦᑐᐊᓗᒻᒥᒃ ᐊᓯᑦᔩᓂᖃᕐᓯᒪᒋᐊᖏᑦ, ᐃᓪᓗᕕᒐᕐᒥᑦ ᐊᓯᕐᕿᖏᑦᑐᒥᒃ ᐃᑯᒪᓕᐅᕐᓂᒧᑦ.
ᔮᓂ ᐅᖃᐅᓯᖃᓚᐅᔪᖅ ᑕᒪᓐᓇ ᐊᓯᑦᔨᓂᐅᓚᖓᔪᖅ ᖃᓄᖅ ᓱᕐᕃᓂᖃᕐᓂᐊᒪᖔᑦ ᐃᒻᒥᒎᓈᕐᑎᑐᓂᒃ ᓄᓇᓕᓐᓂᓗ. ᐅᖃᐅᓯᖃᓚᐅᕐᒥᔪᖅ ᓇᒻᒥᓂᖅ ᐱᕙᓪᓕᖁᑎᖃᓚᖓᓂᕐᒥᒃ ᐅᕐᓱᐊᓗᑦᑐᖏᓐᓂᓴᐅᓂᒃᑯᑦ, ᐱᒻᒪᕆᐅᓂᕃᒻᒥᓱᓂᓗ ᐊᓯᕐᕿᑌᓕᒐᓱᐊᕆᐊᖃᕐᓂᒥᒃ ᐃᑯᒪᖃᕐᑎᑕᐅᓂᒃᑯᑦ, ᐃᓪᓗᒥ ᖃᕆᐊᖅ ᐃᓪᓗᐊᕈᓯᖅ ᐊᑐᓚᖓᖕᖏᑯᕕᐅᒃ ᐃᑯᒪᖏᑦ ᖃᒥᖃᑦᑕᓗᒋᑦ. ᐅᖃᐅᓯᖏᑦ ᐃᕐᙯᑎᑦᓯᒍᑎᐅᓚᐅᕐᑐᑦ ᑭᓇᓕᒫᒃᑯᓂᒃ ᐱᓇᓱᐊᕈᑎᑖᕐᖃᒦᑦ ᐱᒻᒪᕆᐅᒐᓗᐊᕐᒥᑎᓪᓗᒋᑦ, ᐃᑉᐱᒍᓱᑦᓯᐊᓂᕆᒍᓐᓇᑕᖏᑦ ᑐᑭᑖᕈᑎᒋᑦᓯᐊᕈᓐᓇᑕᖏᓪᓗ ᐃᓄᐃᑦ ᐱᒻᒪᕆᐅᒋᐊᓪᓚᒥᒻᒪᑕ.
ᖃᓂᑦᑐᕖᖕᖓᐅᓱᑎᒃ ᑫᕕᑦᑐᐊᓗᓐᓂᒃ ᑕᑯᔪᑦ ᐃᓕᑦᓯᕕᖃᕐᓱᑎᓪᓗ ᖃᐅᔨᒪᔪᒻᒪᕆᓐᓂᒃ
ᐳᓛᕆᐊᕐᑎᑕᐅᓂᖅ ᐱᕕᖃᕐᑎᑕᐅᓚᐅᕐᑐᖅ ᐱᓇᓱᐊᖃᑎᖃᖏᓐᓇᓂᒃᑯᑦ Nergica-ᒥᒃ, ᖃᐅᔨᓴᕐᓂᒨᓕᖓᔪᖅ ᐱᓇᓱᐊᕐᕕᐅᓱᓂ ᐱᓇᓱᐊᒐᖃᓪᓚᕆᑦᑐᖅ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕈᑎᑦᓴᔭᐅᔪᓂᒃ. ᑐᑭᓯᒪᓪᓚᕆᓐᓂᖓ ᐊᓄᕆᒧᑦ ᑫᕙᑦᑐᓂᒃ ᐃᑯᒪᓕᐅᕈᑎᐅᔪᓂᒃ ᑲᔅᐲᓗ ᓄᓇᖁᑎᖓᓂᒃ ᐃᑲᔪᕐᓯᒪᕆᓚᐅᕐᑐᖅ ᑐᑭᓕᑦᓯᐊᒥᒃ ᑐᑭᓯᓇᕐᑐᓯᐊᒥᓪᓗ ᐊᐅᓚᓂᖃᕐᑎᑕᐅᓂᕐᒥᒃ.
ᓂᐅᕐᕈᓯᒪᔪᑦ ᐳᓛᕆᐊᓚᐅᕐᑐᑦ Nergica-ᑯᑦ ᐅᑦᑐᕌᕐᕕᖓᓄᑦ, ᐊᓄᕆᒧᑦ ᑫᕙᑦᑐᐃᑦ ᓯᕿᓂᕐᒧᓗ ᐃᑯᒪᓕᐅᕈᑏᑦ ᐊᑐᕐᑕᐅᕕᖓᓄᑦ ᐅᑦᑐᕋᐅᑎᐅᑦᓱᑎᒃ ᐃᑯᒪᖃᕐᑎᓯᒍᑎᐅᔪᒥᒃ ᐊᑦᔨᐸᓱᒋᔭᐅᔪᒥᒃ ᓄᓇᕕᐅᑉ ᓄᓇᓕᖏᓐᓂ ᐊᑐᕐᑕᐅᔪᒧᑦ. ᑖᕙᓂ, ᓄᓇᕕᒻᒥᐅᑦ ᐅᖄᖃᑎᖃᕈᓐᓇᓯᓚᐅᔪᑦ ᐊᓄᕆᒧᑦ ᑫᕙᑦᑐᓕᕆᔨᐅᔪᓂᒃ, ᐊᐱᕆᐅᑎᖃᖃᑦᑕᓱᑎᒃ ᓴᓇᔭᐅᒋᐊᖃᕈᓯᖏᓐᓂᒃ, ᐊᑦᔨᒌᑦᑐᓂᓪᓗ ᓵᖕᖓᔭᐅᔭᕆᐊᖃᕐᐸᑐᓂᒃ ᐊᒻᒪᓗ ᐊᑑᑎᔭᐅᒋᐊᖃᕐᐸᑐᓂᒃ ᐱᓇᓱᐊᕈᑎᖃᕆᐊᖃᕐᓂᑯᑦ ᑕᒪᒃᑯᓂᖓ ᐃᑯᒪᓕᐅᕈᑎᓂᒃ ᐅᖓᓯᑦᑐᒥᐅᑦ ᓄᓇᖏᓐᓂ.
ᐳᓛᕆᐊᕐᓂᐅᔪᒥ, ᐊᑕᐅᓯᖅ ᑫᕙᑦᑐᖅ ᐋᕐᕿᓱᕐᑕᐅᕉᑕᕆᓚᐅᔪᖅ, ᑕᑯᒋᐅᕈᑕᐅᓚᕿᑦᓱᓂ ᖃᓄᖅ ᓴᓇᔭᐅᒍᓯᖃᓲᖑᒻᒪᖔᑕ ᓇᒻᐸᑎᕐᑕᐅᓲᖑᒻᒪᖔᑕᓗ. ᑖᑯᐊ ᑫᕙᑦᑐᐃᑦ ᐱᑐᐃᑦᔮᑕᐅᓯᒪᑫᓐᓇᓚᐅᔪᒐᓗᐊᕐᑎᓗᒋᑦ ᑯᐯᑉ ᐃᑯᒪᓕᐅᕐᑎᑯᖏᑦ ᓴᓇᕉᑕᕆᓂᖃᕐᓂᖓᓄᑦ, ᐊᑑᑎᔭᐅᓚᐅᔪᖅ ᑖᕙᓂ ᐱᒻᒪᕆᐊᓘᓚᐅᔪᖅ ᑕᑯᒍᑎᐅᓚᐅᔪᒐᒥ ᖃᓄᖅ ᑕᒪᒃᑯᐊ ᐃᑯᒪᓕᐅᕈᑏᑦ ᐊᑦᑕᓇᖕᖏᑐᑦᓯᐊᑯᑦ ᓈᒻᒪᓯᐊᕐᑐᑯᓪᓗ ᑲᒪᒋᔭᐅᒍᓯᖃᓲᖑᒻᒪᖔᑕ.
ᐊᓄᕆᒧᑦ ᐃᑯᒪᓕᐅᕐᑐᒥᒃ ᑕᑯᓐᓇᓂᖅ
ᑖᒃᑯᐊ ᓂᐅᕐᕈᓯᒪᔪᑦ Anse-à-Valleau ᐊᓄᕆᒧᑦ ᐃᑯᒪᓕᐅᕐᕕᖓᓅᓕᓚᐅᔪᒻᒥᔪᑦ, 67 ᑫᕙᑦᑐᐃᑦ ᐃᑯᒪᓕᐅᕐᑐᑦ 100 ᒥᑲᒍᐊᑦ ᐅᖓᑖᓄᑦ ᓲᖑᓂᓕᒻᒥᒃ. ᐅᑦᑐᕋᕐᕕᑎᑑᖕᖏᑐᖅ, ᑖᒃᑯᐊ ᑫᕙᑦᑐᐃᑦ ᐃᑯᒪᓕᐅᕈᑎᐅᓪᓚᕆᑦᑐᑦ, ᑕᑯᔭᐅᒍᓐᓇᓯᓚᐅᔪᑦ ᑐᓵᔭᐅᒍᓐᓇᓯᑦᓱᑎᓪᓗ ᑖᕙᓃᑦᑐᓄᑦ. ᐊᒥᓱᐃᑦ ᖃᐅᔨᓪᓚᕆᓚᐅᔪᑦ ᓂᐸᑭᑦᑐᐊᐱᐅᒋᐊᖏᓐᓂᒃ ᑫᕙᑦᑐᐃᑦ, ᐊᒥᓱᒻᒪᕆᐊᓘᒐᓗᐊᕐᓱᑎᒃ ᑖᕙᓂ ᓄᓇᒥ.
Nergica-ᑯᑦ ᐱᓇᓱᐊᕐᑕᖏᑦᑕ ᑲᒪᔨᖓᓂᒃ ᐃᓚᖃᖏᓐᓇᓱᑎᒃ, ᐃᓄᐃᑦ ᐊᐱᕐᓲᕆᐊᓪᓚᕕᖃᓚᐅᔪᑦ ᑐᑭᓯᓕᐅᒥᑦᓱᑎᓪᓗ ᖃᓄᖅ ᐊᓄᕆᒧᑦ ᐃᑯᒪᓕᐅᕈᑏᑦ ᐊᐅᓚᑕᐅᓲᖑᒻᒪᖔᑕ ᐊᒥᓱᐃᖑᑦᓱᑎᒃ.
ᐊᑐᐃᓐᓇᕈᕐᑎᓂᖅ ᓯᕗᓂᕐᒧᑦ
ᐳᓛᕆᐊᕐᓂᖃᓱᖓᓚᐅᔪᒍᑦ ᐳᕐᑐᓂᕐᓴᕆᐊᓪᓚᒥᒃ ᐃᓕᓐᓂᐊᕕᐅᔪᒧᑦ ᑲᔅᐲᓯᒥ Cégep de la Gaspésie et des Îles-ᒧᑦ, ᓂᐅᕈᓯᒪᔪᑦ ᑐᑭᓯᑎᑕᐅᓚᐅᔪᑦ ᐃᓕᓐᓂᐊᑎᑦᓯᒍᑎᐅᔪᓂᒃ ᑕᑯᓐᓇᑎᑕᐅᑦᓱᑎᓪᓗ. ᐃᓕᓐᓂᐊᕕᐅᑉ ᐱᐅᒃᑯᑎᖏᑦ ᐃᓚᖃᓚᐅᔪᑦ ᐊᓄᕆᒧᑦ ᑫᕙᑦᑐᐃᑦ ᐃᓚᑦᓴᔭᖏᓐᓂᒃ ᑭᖏᑦᑐᒥᓗ ᐱᓇᓱᐊᕐᑐᐃᑦ ᐱᐅᓕᔭᐅᒋᐊᖃᓕᕐᐸᑕ ᐱᒋᐅᕐᓴᕕᒻᒥᒃ, ᑕᑯᒋᐊᓪᓚᕈᑎᐅᓚᐅᔪᑦ ᐃᓕᓐᓂᐊᑕᐅᒋᐊᓕᓐᓂᒃ ᑫᕙᑦᑐᓂᒃ ᑲᒪᒋᔭᖃᕐᓂᒧᑦ.
ᐃᓚᖏᑦ ᐃᓄᑑᓇᕐᑎᑐᑦ ᓇᓗᓀᕐᑕᐅᓚᐅᔪᑦ ᐃᓚᐅᔪᑦᓴᒫᖑᒐᔭᕆᐊᖏᑦ ᓄᓇᕕᒻᒥᐅᑦ ᐃᓕᓐᓂᐊᑎᑕᐅᓯᑉᐸᑕ. ᐳᓛᕆᐊᕐᓯᒪᑦᓱᑎᒃ, ᐃᓚᐅᒍᓐᓇᓯᑎᑕᐅᓚᐅᔪᑦ ᒪᔪᕋᕐᓂᒧᑦ, ᑐᑭᓯᓪᓚᕆᑦᑎᑕᐅᑦᓱᑎᒃ ᖃᓄᐃᑦᑐᓂᖓᓂᒃ ᑭᖏᑦᑐᒥ ᐱᓇᓱᐊᕆᐊᖃᕐᓂᐅᑉ, ᐱᒻᒪᕆᑦᑕᕆᔭᐅᒻᒪᑦ ᑕᒪᓐᓇ ᐊᓄᕆᒧᑦ ᑫᕙᑦᑐᓂᒃ ᓴᓇᕙᒋᐊᖃᕐᓂᒧᑦ. ᑕᒪᓐᓇ ᐃᓚᐅᑎᑕᐅᓂᖅ ᐃᑲᔪᕐᓯᒪᓪᓚᕆᓚᐅᔪᖅ ᑐᑭᓯᓕᐅᒥᒍᑎᐅᑦᓱᓂ ᑎᒥᒃᑯᑦ ᐱᒍᓐᓇᕈᑎᐅᒋᐊᓕᓐᓂᒃ ᐊᑦᑕᓇᕐᑐᒦᒋᒃᑯᑎᐅᒋᓕᐊᓐᓂᓗ ᐱᓇᓱᐊᕐᕕᒥ.
ᑕᕐᖁᑎ ᐱᓇᓱᐊᖃᑎᖃᑦᓯᐊᑐᖅ ᐃᓕᓐᓂᐊᕕᐅᔪᒥᒃ ᓄᐃᑦᓯᖃᑎᒋᒐᓱᐊᕐᓱᒍ ᐃᓕᓐᓂᐊᑎᑦᓯᒍᑎᐅᒐᔭᕐᑐᓂᒃ ᓄᓇᕕᒻᒥᐅᓂᒃ ᑫᕙᑦᑐᓕᕆᔨᐅᒍᒪᒐᔭᕐᑐᓂᒃ. ᐊᒥᓲᓚᖓᖕᖏᑑᒐᓗᐊᑦ ᐱᓇᓱᒉᑦ ᑖᒃᑯᓇᓂ ᐱᓇᓱᐊᕐᑕᐅᔪᓂᒃ, ᑭᓯᐊᓂ ᓄᑖᓂᒃ ᕿᓚᓈᕐᓇᑐᓂᓪᓗ ᓄᐃᑎᕆᒍᑎᐅᓚᖓᔪᑦ ᓄᓇᓕᒻᒥ ᐱᓇᓱᐊᒐᐅᒍᓐᓇᑐᓂᒃ ᓄᐃᕙᓪᓕᐊᔪᓂ.
ᐊᓪᓗᕆᐊᕐᓂᖅ ᐊᓯᕐᕿᓂᖃᖕᖏᑐᒧᑦ ᓯᕗᓂᕐᒧᑦ
ᐳᓛᕆᐊᕐᓯᒪᒍᑎᒥᓂ, ᐊᒥᓱᑦ ᐃᓚᐅᔪᑦ ᓇᑯᕐᒦᒪᕆᓐᓂᖃᓚᐅᕐᑐᑦ ᐃᓚᐅᑎᑕᐅᔪᕕᓂᐅᒋᐊᖅ ᑖᕗᖕᖓᑐᓄᑦ. ᐅᐱᒍᓲᑎᖃᓚᐅᕐᑐᑦ ᐃᓕᑦᓯᒋᐊᓪᓚᑎᑕᐅᒋᐊᖅ ᓄᑕᐅᓯᓕᑎᕈᓐᓇᑐᑎᒍᑦ ᐱᓇᓱᐊᕈᑕᐅᒍᓐᓇᑐᐃᑦ ᒥᑦᓵᓄᑦ, ᐊᐱᕐᓱᕈᓐᓇᕕᖃᑦᓯᐊᓱᑎᒃ ᑐᑭᓯᑦᓯᐊᓕᐅᒥᑦᓱᑎᓪᓗ ᐃᓱᒫᓘᑎᒋᓲᒥᓂᒃ. ᑖᓐᓇ ᐳᓛᕆᐊᕐᓂᖅ ᐱᕈᕐᓭᒍᑎᐅᓪᓚᕆᓚᐅᕐᑐᖅ ᐱᒍᓐᓇᓯᑦᓯᐊᓂᕐᒥᒃ ᑐᑭᓯᒋᐊᓪᓚᓂᕐᒥᓗ ᓴᓗᒪᔪᑎᒍᑦ ᐃᑯᒪᓕᐅᕈᓐᓇᐅᑏᑦ ᐱᓪᓗᒋᑦ, ᑖᕙᓃᓚᐅᕐᑐᑦ ᐃᓱᒫᓗᒍᓐᓀᓕᐅᒥᓚᐅᕐᑐᑦ ᑐᑭᓯᓕᐅᒥᑦᓱᑎᓪᓗ ᓯᕗᓂᕐᒥ ᓄᓇᓕᒥᓂ ᐱᓇᓱᐊᕐᑕᐅᒐᔭᕐᑐᐃᑦ ᒥᑦᓵᓄᑦ.
ᑕᒪᒃᑯᐊ ᐱᓇᓱᐊᕐᑕᐅᔪᑦ ᐃᑯᓪᓚᓕᐅᒥᑎᑦᓯᓚᖓᔪᑦ ᐅᕐᓱᐊᓘᑉ ᐊᑐᕐᑕᐅᓂᖓᓂᒃ ᐊᕙᑎᑦᑎᓂᓪᓗ ᓱᒃᑯᑎᕆᖕᖏᓂᕐᓴᐅᑎᑦᓯᓗᑎᒃ ᓄᓇᕕᐅᑉ ᓄᓇᓕᖏᓐᓂᒃ. ᓄᓇᓖᓪᓗ ᑮᓇᐅᔭᓕᐅᕈᑎᖃᕆᐅᓚᖓᓕᕐᓱᑎᒃ ᐃᑯᒪᓕᐅᕐᓂᒥᒃ, ᑕᒪᓐᓇᓗ ᐱᒍᓐᓇᓯᓚᕿᔭᐅᑦᓱᓂ ᐱᓇᓱᐊᖃᑎᒌᑦᑐᓄᑦ ᓄᓇᓕᓐᓂ.
ᑕᕐᖁᑎ ᓇᑯᒻᒦᓚᕆᑦᑐᖅ Nergica-ᑯᓂᒃ ᐃᑲᔪᕐᓯᒪᖏᓐᓇᓕᒫᕐᓂᖓᓄᑦ ᐱᓇᓱᐊᖃᑎᐅᓂᖓᓄᓪᓗ, Pesca Environment-ᑯᓪᓗ, Techéol-ᑯᑦ, Ganex-ᑯᑦ, Caribou Ungava-ᑯᓪᓗ ᑐᑭᓯᓇᑦᓯᐊᑐᓂᒃ ᐅᖃᐅᓯᖃᕈᑎᖃᓚᐅᕐᒪᑕ. ᓇᑯᕐᒦᑕᐅᒋᐊᓪᓚᒥᔪᑦ CQFME-ᑯᑦ (ᑯᐯᒻᒥ ᐃᓕᓐᓂᐊᑎᑦᓯᕕᐅᔪᖅ ᐊᓄᕆᒧᑦ ᑫᕙᑦᑐᓂᒃ ᓴᓇᓂᕐᒧᑦ) ᐃᑲᔪᕐᓯᒪᓂᕆᔭᖓᓄᑦ ᐱᕙᓪᓕᐊᑎᑦᓯᖃᑎᐅᑦᓱᑎᒃ ᓯᕗᓂᕐᒥ ᐃᓕᓐᓂᐊᑎᑦᓯᒍᑎᐅᒐᔭᕐᑐᓂᒃ ᓄᓇᕕᒻᒥᐅᓂᒃ.
ᑕᕐᖁᑎ ᐱᔪᕆᐅᑎᖃᕐᐳᖅ ᓯᕗᓕᕆᐊᓪᓚᓂᕆᓚᐅᕐᑕᒥᓂᒃ ᓄᓇᕕᒻᒥᐅᓂᒃ ᐳᓛᕆᐊᕐᑎᓱᒋᑦ ᑲᔅᐲᒧᑦ ᐃᓕᑦᓯᓕᐅᒥᑎᑦᓱᒋᑦ ᐱᓇᓱᐊᕈᑕᐅᒍᓐᓇᑐᓂᒃ ᐃᑯᒪᓕᐅᕐᓂᒧᑦ ᓯᕗᓂᕐᒥ. ᐱᓇᓱᐊᖃᑎᒌᑦᓱᑕ, ᐱᕈᕐᓭᕗᒍᑦ ᖃᐅᔨᒪᒍᑎᑦᓴᓂᒃ, ᐱᒍᓐᓇᓯᒍᑎᑦᓴᓂᒃ ᐱᓇᓱᐊᖃᑎᒌᓂᐅᔪᓂᓪᓗ ᑭᖕᖑᒪᓇᕐᑐᓂᒃ ᓄᓇᕕᒃ ᐃᑯᒪᓕᐅᕈᓐᓇᓯᖁᓪᓗᒍ ᐊᓯᕐᕿᓂᐅᖕᖏᑐᒃᑯᑦ – ᑭᖑᕙᕆᓂᐊᕐᑕᕗᑦ ᐱᓪᓗᒋᑦ.
ᐊᑦᔨᖑᐊᑦ
