Nunavik Interest Towards Clean Energy Transition Take the survey now!

ᓯᓪᓕᑎᒃ, ᖃᔪᓯᑦᓯᐊᓚᐅᔪᖅ ᑲᑎᒪᓂᒻᒪᕆᐅᑦᓱᓂ ᐱᑦᔪᑎᒋᑦᓱᒍ ᓄᓇᕕᐅᑉ ᐃᑯᒪᓕᐅᕈᑎᖃᕐᓂᖓ ᐊᓯᑦᔨᐸᓪᓕᐊᖁᓪᓗᒍ

ᐊᐅᒡᒎᓯᐅᓚᐅᕐᑐᒥ, ᑕᕐᖁᑎ ᐱᑐᕝᕕᑯᓪᓗ ᓄᓇᒥᒃ ᑎᒍᒥᐊᕐᑎᖓ ᑲᑎᒪᑎᑦᓯᓂᖃᓚᐅᔪᑦ ᐃᓄᒃᔪᐊᒥ ᓯᓪᓕᑎᒥᒃ ᑌᔭᐅᓂᓕᕐᒥᒃ, ᓯᕗᓪᓕᐸᐅᑦᓱᓂ ᓴᓗᒪᔪᒥᒃ ᐃᑯᒪᓕᐅᕈᑎᖃᕈᒪᓂᕐᒨᓕᖓᔪᖅ ᑲᔪᓯᓚᐅᔪᖅ.  ᑕᓐᓇ ᑲᑎᒪᓂᖅ ᐱᒻᒪᕆᒻᒥᒃ ᓄᐃᑦᓯᒋᐊᖕᖓᓂᐅᓚᐅᔪᖅ ᐊᑕᐅᑦᓯᑰᕐᑐᒥᒃ ᐊᔪᐃᓐᓇᕈᑎᖃᕈᒪᓂᕐᒥᒃ ᓄᓇᕕᐅᑉ ᐃᑯᒪᓕᐅᕈᑎᖃᕐᓂᖓ ᐊᓯᑦᔨᐸᓕᐊᖁᓕᕐᓱᒍ.  ᐱᖓᓱᓂᒃ ᐅᓪᓗᓂᒃ ᑲᑎᒪᒋᐊᕐᓯᒪᓚᐅᔪᑦ 70 ᓄᓇᕕᒻᒥᑦ ᑭᒡᒐᑐᕐᓱᑎᒃ ᓄᓇᓕᓐᓂᒃ, ᐃᓚᐅᒻᒥᑎᓗᒋᑦ 15 ᓴᓗᒪᔪᒥᒃ ᐃᑯᒪᓕᐅᕐᓂᒧᑦ ᖃᐅᔨᒪᔪᒻᒪᕇᑦ ᑲᕙᒣᓪᓗ ᑭᒡᒐᑐᕐᑎᖏᑦ.

ᑲᑎᒪᔪᓂ ᐅᖄᔭᐅᓚᐅᔪᖅ ᖃᓄᐃᓕᖓᓕᕐᓂᖓ ᐃᓐᓇᕕᐅᑉ ᐱᓇᓱᐊᕐᑕᐅᓯᒪᓂᖓ, ᑲᑎᒪᓂᐊᕈᓯᖃᕐᑎᓯᑦᓱᑕᓗ ᓄᓇᓕᐅᑉ ᐃᓚᐅᒍᓐᓇᕆᐊᖃᕐᓂᖓᓅᓕᖓᔪᓂᒃ, ᐅᓂᒃᑲᑐᖃᖃᑦᑕᒥᑎᓪᓗᒍ ᓄᓇᕕᒃ ᖃᓄᐃᓕᖓᔪᒥᒃ ᐃᑯᒪᓕᐅᕈᑎᖃᕐᒪᖔᑦ, ᑕᑯᑦᓴᐅᑎᑕᐅᒻᒥᑎᓪᓗᒋᑦ ᓴᓗᒪᔪᒃᑯᑦ ᐃᑯᒪᓕᐅᕈᑎᐅᒍᓐᓇᑐᑦᓴᔦᑦ, ᓴᓗᒪᔪᒃᑯᓗ ᐃᑯᒪᓕᐅᕈᑏᑦ ᖃᓄᑎᒋᒃ ᓱᕐᕃᓯᒪᒻᒪᖔᑕ ᐊᒻᒪᓗ ᐃᑯᒪᓕᐅᕈᑎᖃᑦᓯᐊᓂᒃᑯᑦ ᑐᑭᓯᔭᐅᓯᒪᔪᐃᑦ.

“ᐅᒃᑯᐃᖓᑦᓯᐊᑐᒥᒃ ᐅᖃᓂᖃᓚᐅᔪᑦ ᑐᑭᓯᒪᔭᐅᔪᓂᓪᓗ ᓄᐃᑎᕆᓂᖃᑦᓯᐊᓱᓂ ᓯᓪᓕᑎᐅᑉ ᑲᑎᒪᓂᖓᓂ.  ᐅᑉᐱᕆᔭᖃᑦᓯᐊᑐᒻᒪᕆᐅᕗᒍᑦ ᓴᓗᒪᔪᒃᑯᑦ ᐃᑯᒪᓕᐅᕈᑎᖃᕐᓂᖅ ᓯᕗᓕᕐᑕᐅᒍᓐᓇᓯᐊᕆᐊᖓ ᐃᓅᖃᑎᑦᑎᓄᑦ ᐊᒻᒪᓗ ᓄᓇᕕᒃ ᓂᕆᐅᒋᔭᖃᕐᐳᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᔭᐅᓂᖏᑦ ᐱᒻᒪᕆᐅᓚᖓᒋᐊᖏᑦ ᓄᓇᓕᑦᑎᓄᑦ,” ᐅᖃᓚᐅᔪᖅ ᑯᓗ ᑐᑲᓚᒃ, ᐃᓚᒌᓴᒃᑯᑦ ᑲᑎᒪᔨᖏᓐᓄᑦ ᐊᖓᔪᕐᖄᖅ ᐊᒻᒪᓗ ᑕᕐᖁᑎᐅᑉ ᑲᑎᒪᔨᖏᓐᓄᑦ ᐃᓚᒋᔭᐅᑦᓱᓂ.

“ᓄᓇᕕᐅᑉ ᐃᑯᒪᓕᐅᕈᓯᖓᑕ ᐊᓯᑦᔨᐸᓪᓕᐊᓂᖓ ᐱᒋᐊᕐᓯᒪᓕᕐᖁᖅ ᐊᒻᒪᓗ ᓯᓪᓕᑎᒃ 2023 ᑲᔪᓯᒍᓐᓇᓯᐊᓚᐅᕐᓂᖓ ᑕᑯᑦᓴᐅᑎᑦᓯᕗᖅ ᓄᓇᓕᑦᑕ ᓱᖑᓂᖃᑦᓯᐊᓂᖓᓂᒃ ᐅᕐᓱᐊᓗᑦᑐᑐᓂᒃ ᐊᑐᖕᖏᓂᕐᓴᐅᒍᒪᓂᕐᒧᑦ.  ᑖᓐᓇ ᐱᓇᓱᐊᕈᓯᖅ ᐅᐃᑦᓯᐊᓇᓚᐅᕐᑐᖅ ᑐᑭᓯᒍᑎᒋᑦᓱᒍ ᓯᓚᐅᑉ ᐊᓯᑦᔨᐸᓪᓕᐊᓂᖓᑕ ᓱᕐᕃᓯᒪᓕᕐᓂᖓᓂᒃ ᐃᓅᓯᑦᑎᓂᒃ, ᐱᓗᐊᕐᑐᒥᒃ ᖃᓄᐃᓘᕐᑎᐅᒍᓐᓇᕆᐊᖃᕐᓂᑎᓐᓂᒃ, ᐃᒻᒥᒎᓈᕐᑎᓗᑕ ᓄᓇᓕᓐᓂᓗ ᓯᕗᓕᕐᑎᐅᓗᑕ, ᐊᐅᓚᑦᔭᕆᐊᕈᑎᖃᓕᕐᓗᑕ ᓄᐃᑎᕆᓂᕐᒥᒃ ᓴᓗᒪᔪᒃᑯᑦ ᐃᑯᒪᓕᐅᕈᓯᕐᓂᒃ ᖃᓄᐃᓕᖓᒍᒪᓂᕗᑦ ᑐᖕᖓᕕᒋᓗᒍ,” ᐅᖃᓚᐅᕐᑐᖅ ᐃᐊᕇ ᐊᑕᒎᑦᑖᓗ, ᐃᓐᓇᕕᐅᑉ ᐱᓇᓱᐊᕐᑕᐅᓂᖓᓂᒃ ᑐᑭᒧᐊᑦᑎᓯᔨ.

ᑖᓐᓇ ᑲᑎᒪᓂᖅ ᓯᕗᓕᕐᑕᐅᓚᐅᕐᑐᖅ ᑕᕐᖁᑎᒧᑦ ᐱᑐᕝᕕᐅᓗ ᓄᓇᒥᒃ ᑎᒍᒥᐊᕐᑎᖓᓄᑦ ᐊᒻᒪᓗ ᓴᐳᑎᓯᒪᔭᐅᑦᓯᐊᓱᓂ ᐃᓐᓇᕕᐅᑉ ᐃᑯᒪᐅᑎᓕᐅᑎᖓᓄᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᑯᐯᑉ ᑲᕙᒪᖓᓄᑦ, ᑲᓇᑕᐅᑉ ᑲᕙᒪᖓᓄᑦ, Trottier ᐃᓚᒌᑦ ᑮᓇᐅᔭᖃᕐᑎᓯᕕᖓᓄᑦ, McConnell ᑮᓇᐅᔭᖃᕐᑎᓯᕕᖓᓄᑦ ᐊᒻᒪᓗ ᑯᐯᒃᑯᑦ ᐃᑯᒪᐅᑎᓕᐅᕐᑎᖏᓐᓄᑦ.