ᓄᐃᑕᐅᑦᓴᐅᑎᒋᒋᐊᓕᒃ
ᓄᓇᒥᒃ ᐃᓂᒋᔭᐅᓛᕐᑐᒥᒃ ᐳᐊᕐᕆᔭᕐᓂᖅ ᑲᑎᑎᑦᓯᕗᖅ ᓄᓇᓕᐅᑉ ᓯᕗᓕᕐᑎᖏᓐᓂᒃ, ᑐᖕᖓᕕᖃᖃᑎᒌᓂᒃ ᐱᓇᓱᐊᕐᑕᐅᔪᒥᓪᓗ ᐱᓇᓱᐊᖃᑎᒌᑦᑐᓂᒃ ᐱᒻᒪᕆᕋᑕᖅ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᐱᒋᐊᕐᑎᓯᓂᖅ ᓄᓇᕕᒻᒥ ᓴᓇᔭᐅᒋᐊᓚᖓᓯᑎᓪᓗᒍ.
ᖁᐊᕐᑕᖅ, ᓄᓇᕕᒃ – ᔫᓂ 18, 2026 – ᑕᒡᒐᓂ ᐱᓇᓱᐊᕈᓯᕐᒥ ᑕᕐᖁᑎ ᐱᒋᐊᕐᑎᓯᓯᕗᖅ ᓴᓇᔭᐅᓂᕆᓂᐊᓕᕐᑕᖓᓂ ᑎᖏᕐᕋᐅᑕᐅᑉ ᐊᓄᕆᒥᒃ ᐃᑯᒪᓕᐅᕈᑎᖃᕐᓂᐅᑉ ᐱᓇᓱᐊᕐᑕᐅᒍᑎᒋᓂᐊᕐᑕᖓᓂᒃ ᓄᓇᒥᒃ ᐃᓂᑦᓴᕆᓂᐊᕐᑕᖓᓂᒃ ᐳᐊᕆᔭᕐᓂᖃᕐᑎᓯᓗᓂ ᖁᐊᕐᑕᒥ, ᑲᑎᑎᑦᓯᓗᓂ ᓄᓇᓕᒻᒥ ᓯᕗᓕᕐᑎᓂᒃ, ᓄᓇᓕᒻᒥᓗ ᐱᓇᓱᐊᖃᑎᒌᑦᑐᓂᒃ ᑕᕐᑯᑎᒥᓗ ᑐᖕᖓᕕᖃᖃᑎᐅᔪᓂᒃ ᑭᒡᒐᑐᕐᑐᓂᒃ ᒪᑭᕝᕕᒥᒃ ᐃᓚᒌᓴᕐᒥᓗ.
ᑖᓐᓇ ᑲᑎᓐᓂᖅ ᐃᓕᑕᕐᓯᒍᑎᐅᓚᐅᕐᑐᖅ ᐱᒋᐊᕐᑎᑕᐅᓂᖓᓂᒃ ᓴᓇᔭᐅᓂᕆᓂᐊᓕᕐᑕᖓᑕ ᑎᖏᕐᕋᐅᑕᐅᑉ ᐱᓇᓱᐊᕐᑕᐅᓂᖓᑕ, ᐱᒻᒪᕆᐊᓗᒃ ᐊᓪᓗᕆᐊᕐᓂᐅᓱᓂ ᓯᕗᓂᕐᒧᑦ ᐱᕙᓪᓕᐊᑎᑦᓯᓂᐅᑦᓱᓂ ᓄᓇᓕᒨᓕᖓᔪᒥᒃ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᐅᔪᒥᒃ ᓄᓇᕕᒻᒥ. ᑖᓐᓇ ᐊᑦᔨᐅᖏᑦᑐᖅ ᓄᑖᕕᖕᖓᐅᓱᓂᓗ ᐱᓇᓱᐊᕐᑕᐅᔪᖅ ᓄᐃᑕᑎᑦᓯᒍᑎᐅᕗᖅ ᑲᔪᓯᔪᒥᒃ ᐱᕙᓪᓕᐊᓂᐅᔪᒥᒃ ᐃᑯᓪᓚᑎᑦᓯᒐᓱᐊᕐᓂᒧᑦ ᐅᕐᓱᐊᓗᑦᑐᑐᑎᒍᑦ ᐃᑯᒪᓕᐅᕈᑎᐅᔪᓂᒃ ᐃᑲᔪᕐᓯᒪᒍᑎᐅᑦᓱᓂ ᐃᓄᐃᑦ ᐃᓚᐅᒍᓐᓇᓂᖓᓂᒃ ᓯᕗᓕᕈᓐᓇᓂᖓᓂᓪᓗ ᓄᓇᕕᐅᑉ ᐃᑯᒪᓕᐅᕐᓂᒧᑦ ᓯᕗᓂᑦᓴᕆᔭᖓᓄᑦ.
“ᓴᓇᔭᐅᒋᐊᓯᓂᐅᔪᖅ ᖁᐊᕐᑕᒥ ᓄᐃᑕᑎᑦᓯᕗᖅ ᐱᒻᒪᕆᐊᓗᒻᒥᒃ ᐊᓪᓗᕆᐊᕐᓂᕆᔭᖓᓂᒃ ᓄᓇᕕᐅᑉ,” ᐅᖃᕐᑐᖅ ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᕐᖄᖓ. “ᐊᕐᕋᒍᓂ ᐊᒥᓱᓂ, ᓄᓇᓕᕗᑦ ᕿᒥᕐᕈᓯᒪᓕᕐᒪᑕ ᐅᕐᓱᐊᓗᑦᑐᑐᓂᒃ ᐊᑐᖕᖏᓂᕐᓴᐅᒍᒪᓕᕐᓱᑎᒃ ᐱᕙᓪᓕᐊᑕᐅᓂᖓᓗ ᓄᐃᑕᑎᑦᓯᒍᑕᐅᑦᓯᐊᖁᑦᓱᒍ ᐃᓄᐃᑦ ᓯᕗᓪᓕᐸᐅᑦᔭᐅᔪᑦᓴᖁᑎᖏᓐᓂᒃ ᑐᑭᑖᕈᓐᓇᕈᑎᖏᓐᓂᓗ. ᑎᖏᕐᕋᐅᑕᖅ ᓄᐃᑦᓯᕗᖅ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᐱᓇᓱᐊᕐᓃᑦ ᐱᕙᓪᓕᐊᑎᑕᐅᒍᓐᓇᓂᖓᓂᒃ ᓲᓱᒋᔭᖃᑦᓯᐊᓂᒃᑯᑦ ᓄᓇᓕᐅᑉ ᖃᓄᐃᓕᖓᓂᖓᓂᒃ ᑖᕗᖓᐅᓕᔪᓂᓪᓗ ᐱᕙᓪᓕᕈᑎᓕᐅᕈᑕᐅᑦᓱᓂ ᖃᓂᓐᓂᓴᐅᔪᑎᒍᑦ. ᕿᓚᓈᕐᐳᒍᑦ ᑕᑯᓐᓇᓚᖓᒋᐊᖅ ᑖᑦᓱᒪ ᐱᓇᓱᐊᕐᑕᐅᔫᑉ ᑕᑯᑦᓴᐅᕙᓪᓕᐊᓂᕆᓚᖓᔭᖓᓂᒃ ᑕᕐᕿᓂ ᙯᔪᓂ.”
ᑖᓐᓇ ᖃᑎᖃᑎᒌᓐᓂᖅ ᐃᓚᐅᕕᐅᓚᐅᕐᑐᖅ ᓄᓇᓕᒻᒥ ᓯᕗᓕᕐᑎᐅᔪᓄᑦ, ᓄᓇᓕᒻᒥᒃ ᑭᒡᒐᑐᕐᑎᐅᔪᓄᑦ, ᖁᐊᕐᑕᐅᑉ ᑯᐊᐸᖓᓄᑦ, ᑐᕚᓗᒃ ᓄᓇᒥᒃ ᑎᒍᒥᐊᕐᑎᖑᖓᓄᑦ, ᑕᕐᖁᑎᒥᓗ ᑐᖕᖓᕕᖃᖃᑎᖐᓄᑦ ᒪᑭᕝᕕᑯᓐᓄᑦ ᐃᓚᒌᓴᒃᑯᓄᓪᓗ. ᐱᓇᓱᐊᖃᑎᒌᑦᓱᑎᒃ, ᐃᓚᐅᓂᖓᑦ ᓄᐃᑦᓯᓯᒪᔪᖅ ᐃᑲᔪᖃᑎᒌᒍᑎᖃᕐᓯᒪᓂᕐᒥᒃ ᑎᖏᕐᕋᐅᑕᐅᑉ ᐱᓇᓱᐊᕐᑕᐅᓂᖓᓂᒃ ᐱᒻᒪᕆᐅᓂᖓᓂᓪᓗ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᐅᑉ ᐱᕙᓪᓕᐊᑎᑕᐅᓂᖓ ᓄᓇᕕᒻᒥ ᑐᖕᖓᕕᖃᑦᓯᐊᕆᐊᖃᕐᓂᖓᑕ ᓄᓇᓕᐅᑉ ᓯᕗᓪᓕᐸᐅᑦᔭᐅᔪᑦᓴᖁᑎᖏᓐᓂᒃ ᑖᕗᖓᐅᓕᑦᓯᐊᑐᓂᓪᓗ ᓄᓇᓕᒃ ᐱᕙᓪᓕᖁᑎᖃᖁᓪᓗᒍ.
“ᖁᐊᕐᑕᐅᑉ ᑯᐊᐸᖓᓄᑦ, ᑕᑦᓱᒧᖓ ᐱᓇᓱᐊᕐᑕᐅᔪᒧᑦ ᐃᓚᐅᓂᕗᑦ ᐱᑦᔪᑎᖃᕐᑐᖅ ᐃᑲᔪᕐᓯᒪᒍᒪᓂᕐᒥᒃ ᖃᓄᐃᓘᕈᑎᑦᓯᐊᓂᒃ ᐱᕙᓪᓕᖁᑎᑦᓯᐊᖑᒍᓐᓇᓚᖓᔪᓂᒃ ᓄᓇᓕᑦᑎᓂᒃ ᐅᓪᓗᒥ ᓯᕗᓂᕐᒥᓗ.” ᐅᖃᕐᑐᖅ ᒍᐃᓕᐊᒻ ᓂᖏᐅᕈᕕᒃ, ᖁᐊᕐᑕᐅᑉ ᑯᐊᐸᖓᑕ ᐊᖓᔪᕐᖄᖓ. “ᑎᖏᕐᕋᐅᑕᖅ ᑕᑯᑦᓴᐅᑎᑦᓯᕗᖅ ᖃᓄᖅ ᓄᓇᓕᐅᑉ ᑎᒥᖁᑎᖏᑦ ᐱᒻᒪᕆᐅᑎᒋᒻᒪᖔᑕ ᐱᕙᓪᓕᐊᑎᑦᓯᖃᑎᐅᑦᓱᑎᒃ ᐱᓇᓱᐊᕐᓂᐅᔪᓂᒃ ᐃᑲᔪᕐᓯᒪᓚᖓᔪᓂᒃ ᐃᑯᒪᓕᐅᕐᓂᐅᑉ ᐊᓯᑦᔨᑐᕐᑕᐅᕙᓪᓕᐊᓂᖓᓂᒃ, ᓄᐃᑎᕆᖃᑎᐅᓂᒃᑯᑦ ᐱᕕᑦᓴᖃᕐᕕᐅᓚᖓᔪᓂᒃ ᐃᑲᔪᕐᓯᒪᒍᑎᐅᓗᓂᓗ ᖃᓄᐃᖕᖏᓯᐊᕐᓂᓴᖓᓂᒃ ᓄᓇᓕᑦᑕ.”
ᓄᓇᓕᒻᒥ ᐱᓇᓱᐊᖃᑎᐅᑦᓱᓂ, ᑐᕚᓗᒃ ᓄᓇᒥᒃ ᑎᒍᒥᐊᕐᑎᖓ ᐱᒻᒪᕆᐊᓗᒻᒥᒃ ᐊᑑᑎᖃᕐᓯᒪᒻᔪᖅ ᐃᑲᔪᕐᓯᒪᑦᓱᓂ ᑎᖏᕐᕋᐅᑕᐅᑉ ᐱᕙᓪᓕᐊᔭᐅᓂᖓᓂᒃ ᖁᐊᕐᑕᒥ. ᐃᓚᐅᓂᖓ ᓄᐃᑕᑎᑦᓯᒍᑎᐅᔪᖅ ᐱᒻᒪᕆᐅᓂᖓᓂᒃ ᓄᓇᓕᐅᑉ ᐃᓚᐅᒋᐊᖃᕐᓂᕆᔭᖓᓂᒃ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕈᑎᐅᔪᓂ ᐊᒻᒪᓗ ᐱᕙᓪᓕᐊᓂᐅᔪᐃᑦ ᓲᓱᒋᔭᖃᑦᓯᐊᕆᐊᖃᕐᓂᖓᓂᒃ ᓄᓇᓕᐅᑉ ᓄᓇᖁᑎᖏᓐᓂᒃ, ᓄᓇᓕᐅᑉ ᓯᕗᓕᕐᑎᖏᓐᓂᒃ ᓄᓇᓕᐅᓪᓗ ᑐᑭᑖᕐᑐᐃᔨᐅᓂᖓᓂᒃ.
“ᑖᓐᓇ ᐱᓇᓱᐊᕐᑕᐅᔪᖅ ᐊᑑᑎᔪᖅ ᓄᓇᖁᑎᑦᑎᓂ, ᓄᓇᓕᑦᑎᓂ ᐱᒻᒪᕆᐅᕗᓪᓗ ᓄᓇᓕᒻᒥ ᓂᐱᒋᔭᐅᔪᑦ ᐃᓚᔭᐅᑦᓯᐊᕆᐊᖃᕐᓂᖓᑦ,” ᐅᖃᕐᑐᖅ ᒣ ᑕᕐᕿᐊᐱᒃ, ᑐᕚᓗᒃ ᓄᓇᒥᒃ ᑎᒍᒥᐊᕐᑎᑯᑦ ᐊᖓᔪᕐᖄᖓ. “ᐱᔪᕆᐅᑎᖃᕐᐳᒍᑦ ᓴᐳᑦᔨᓯᒪᒋᐊᒥᒃ ᐱᓇᓱᐊᕐᑕᒥᒃ ᐱᑐᑦᓯᒪᑎᑦᓯᔪᒥᒃ ᓯᕗᓂᑦᓴᖓᓄᑦ ᖁᐊᕐᑕᐅᑉ ᐱᕙᓪᓕᖁᑎᐅᓚᖓᑦᓱᓂᓗ ᓄᓇᓕᑦᑎᓄᑦ ᓴᓇᓂᖅ ᐊᐅᓚᑕᐅᓂᖓᓗ ᐊᕐᕌᒍᓂ ᙯᔪᓂ ᓵᖕᖓᓯᑦᓯᐊᕈᑕᐅᓗᓂᓗ ᓯᓚᐅᑉ ᐊᓯᑦᔨᓯᒪᓕᕐᓂᖓᑕ ᐊᐅᓚᑦᔭᕈᑕᐅᕙᓪᓕᐊᓂᖓᓂᒃ.”
“ᖁᕕᐊᓇᕐᑐᒪᕆᐅᓯᒪᔪᖅ ᐃᓚᐅᒋᐊᖅ ᐱᕙᓪᓕᐊᔭᐅᓂᖓᓄᑦ ᑕᑦᓱᒪ ᐱᒻᒪᕆᐊᓘᑦᓱᓂ ᐊᐅᓚᑦᔭᕆᐊᕐᓂᐅᑉ ᓄᓇᕕᒻᒥ,” ᐅᖃᕐᑐᖅ ᑯᓗ ᑐᑲᓚᒃ, ᐃᓚᒋᓴᐅᑉ ᐊᖓᔪᕐᖄᖓ. “ᑎᖏᕐᕋᐅᑕᖅ ᑐᖕᖓᕕᖃᕐᑐᖅ ᑕᑯᓐᓇᕈᓯᐅᓯᒪᔪᒥᒃ ᐱᒋᐊᓚᐅᕐᑐᕕᓂᕐᒥᒃ ᐊᕐᕌᒍᓂ ᐊᓂᒍᕐᓯᒪᓕᕐᑐᓂ, ᐃᓚᒋᓴᖅ ᒪᑭᕝᕕᓗ ᑲᑎᐅᑎᓂᕕᓂᖓᓂᑦ ᓄᐃᑦᓯᓱᑎᒃ ᑕᕐᖁᑎᐅᓕᕐᑐᒥᒃ ᐅᓪᓗᒥ. ᐅᑉᐱᕈᓱᑦᓯᐊᐳᖓ ᐱᒻᒪᕆᐅᓂᖓᓂᒃ ᐃᓕᑕᕐᓯᒋᐊᒥᒃ ᓯᕗᓕᕐᑎᓂᒃ ᑲᑎᒪᔨᐅᔪᓂᓪᓗ ᐃᑲᔪᕐᓯᓯᒪᔪᓂᒃ ᑕᒪᓐᓇ ᐱᓇᓱᐊᖃᑎᒌᓐᓂᖅ ᐱᒍᓐᓇᓯᖁᓪᓗᒍ, ᐃᓚᒋᔭᐅᑎᓗᒍ ᐋᓕᕙ ᑐᓗᒐᐅᓯᒪᔪᖅ, ᐃᓚᒌᓴᕐᒥ ᐊᖓᔪᕐᖃᖑᓯᒪᔪᖅ, ᓯᕗᓕᕐᓂᖓ ᐃᑲᔪᕐᓯᓚᕆᑦᓯᒪᒻᒪᑦ ᑕᒪᑦᓱᒥᖓ ᐃᓱᒪᒋᔭᐅᓯᒪᔪᒥᒃ ᑫᓪᓗᑐᐃᖃᑎᐅᑦᓱᓂ ᐱᒋᐊᕐᐸᓕᐊᓕᕐᓂᖓᓂᑦ. ᐅᓪᓗᒥ, ᑖᓐᓇ ᑕᑯᓐᓇᕈᓯᐅᓯᒪᔪᖅ ᑲᔪᓯᕗᖅ ᐱᓇᓱᐊᕐᑕᐅᔪᑎᒍᑦ ᐅᑦᑑᑎᒋᓗᒍ ᑎᖏᕐᕋᐅᑕᖅ, ᐃᑲᔪᕐᓯᒪᒍᑎᐅᑦᓱᓂ ᑮᓇᐅᔭᑎᒍᑦ ᐱᕕᖃᕐᕕᐅᒍᓐᓇᑐᓂᒃ ᓴᓗᒪᔪᑎᒍᑦ ᐃᑯᒪᓕᐅᕐᓂᑯᑦ ᓲᖑᓯᓭᒍᑎᐅᑦᓱᓂᓗ ᐃᑯᒪᓕᐅᕐᓂᑯᑦ ᐊᑦᑕᓀᑦᑑᒦᒍᑎᒋᒍᓐᓇᑕᖓᓂᒃ ᓄᓇᕕᐅᑉ.”
ᓴᓇᓂᐅᓚᖓᔪᖅ ᐱᒋᐊᓯᔪᖅ ᖁᐊᕐᑕᒥ ᑲᔪᓯᓚᖓᑦᓱᓂᓗ ᑕᕐᕿᓂ ᙯᔪᓂ. ᑕᒡᒐᓂ ᐊᕐᕋᒍᒥ ᐱᓇᓱᐊᕐᓂᐅᓚᖓᔪᑦ ᐃᑉᐱᒋᔭᖃᓗᐊᖕᖑᐊᓚᖓᔪᑦ ᓴᓇᓂᕐᒥᒃ ᐃᓪᓗᓂᒃ, ᐊᕐᖁᓯᐅᕐᓂᒥᒃ ᑫᕙᑦᑐᐃᓗ ᑐᖕᖓᕕᑦᓴᖓᓂ ᐊᑐᐃᓐᓇᕈᕐᑎᓂᐅᓗᓂ ᐱᓇᓱᐊᑕᐅᔪᑉ ᑐᖓᓕᕆᓂᐊᕐᑕᓂ. ᑫᕙᑦᑐᐃᑦ ᑎᑭᑎᑕᐅᓂᖓ ᐋᕐᕿᓱᕐᑕᐅᓂᖓᓗ ᓂᕆᐅᒋᔭᐅᔪᖅ ᐊᑑᑎᒐᔭᕆᐊᖓ ᓴᓇᓐᓇᓯᒻᒥᐸᑦ ᐅᐱᕐᖔᖑᓛᕐᑐᖅ, ᑌᑲᓂ ᑕᕐᖁᑎ ᓄᓇᓕᒻᒥᒃ ᖁᕕᐊᓱᖃᑎᒌᑦᑎᓯᓂᖃᓛᕐᑐᖅ ᑫᕙᑦᑐᖅ ᐃᖏᕐᕋᓯᑎᑕᐅᓕᕐᐸᑦ ᐊᐅᓚᑕᐅᓂᑦᓴᖓᓗ ᐱᒋᐊᓛᓯᑉᐸᑦ.
ᑕᒡᒐᓂ ᐱᓇᓱᐊᕈᓯᕐᒥ ᑲᑎᓐᓂᐅᔪᑦ ᓄᐃᑕᑎᑦᓯᒍᑎᐅᒐᓗᐊᕐᑎᓗᒍ ᐱᒋᐊᒻᒪᕆᑦᑎᑕᐅᓕᕐᓂᖓᓂ ᓴᓇᓂᐅᑉ, ᓯᕗᓂᕐᒥ ᐃᖏᕐᕋᓯᑎᑕᐅᓪᓚᕆᓐᓂᕆᓛᕐᑕᖓ ᐱᕕᖃᕐᕕᐅᓯᐊᓛᕐᑐᖅ ᓄᓇᓕᒃ ᑲᑎᖃᑎᒌᒍᑎᖃᕐᑎᓗᒍ ᖁᕕᐊᓲᑎᖃᕐᓗᓂ ᐱᔭᕇᕐᑕᐅᓂᖓᓂ ᐱᓇᓱᐊᕐᑕᐅᔫᑉ, ᐃᓕᑕᕐᓯᓂᕐᖃᕐᓗᓂᓗ ᐊᒥᓱᓂ ᐃᓄᓐᓂᒃ ᐃᑲᔪᕐᓯᓯᒪᔪᓂᒃ ᑖᓐᓇ ᑎᖏᕐᕋᐅᑕᖅ ᓄᐃᒍᓐᓇᓯᑎᑦᓱᒍ.
ᑎᖏᕐᕋᐅᑕᖅ ᐃᓚᒋᔭᐅᔪᖅ ᑕᕐᖁᑎᐅᑉ ᐃᓗᓐᓈᒍᑦ ᑎᓕᔭᐅᒪᖑᑎᒋᔭᖓᓄᑦ ᐱᕙᓪᓕᐊᑎᑦᓯᓚᖓᓗᓂ 12-ᓂᒃ ᓄᓇᓕᒻᒥ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕈᑕᐅᒍᓐᓇᑐᓂᒃ ᓄᓇᕕᒻᒥ, ᐱᓇᓱᐊᖃᑎᖃᕐᓱᓂ ᑯᐯᒃᑯᑦ ᐃᑯᒪᓕᐅᕐᑎᖏᓐᓂᒃ, ᐃᑲᔪᕐᓯᒪᔪᓂᒃ ᐊᕙᑎᒥᒃ ᐯᕐᓯᓂᕐᒨᓕᖓᔪᓂᒃ, ᐃᓄᐃᑦ ᓇᒻᒥᓂᕐᓱᕈᒪᓂᖓᓂᒃ, ᓄᓇᓕᐅᑉ ᐃᓚᐅᒋᐊᖃᕐᓂᖓᓂᒃ ᐊᕗᖓᐅᓕᔪᑎᒍᓪᓗ ᑮᓇᐅᔭᑎᒍᑦ ᐱᕙᓪᓕᐊᕈᑕᐅᒍᓐᓇᑐᓂᒃ.
ᑎᖏᕐᕋᐅᑕᖅ ᐃᓚᒋᔭᐅᔪᖅ ᑕᕐᖁᑎᐅᑉ ᐃᓗᓐᓈᒍᑦ ᑎᓕᔭᐅᒪᖑᑎᒋᔭᖓᓄᑦ ᐱᕙᓪᓕᐊᑎᑦᓯᓚᖓᓗᓂ 12-ᓂᒃ ᓄᓇᓕᒻᒥ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕈᑕᐅᒍᓐᓇᑐᓂᒃ ᓄᓇᕕᒻᒥ, ᐱᓇᓱᐊᖃᑎᖃᕐᓱᓂ ᑯᐯᒃᑯᑦ ᐃᑯᒪᓕᐅᕐᑎᖏᓐᓂᒃ, ᐃᑲᔪᕐᓯᒪᔪᓂᒃ ᐊᕙᑎᒥᒃ ᐯᕐᓯᓂᕐᒨᓕᖓᔪᓂᒃ, ᐃᓄᐃᑦ ᓇᒻᒥᓂᕐᓱᕈᒪᓂᖓᓂᒃ, ᓄᓇᓕᐅᑉ ᐃᓚᐅᒋᐊᖃᕐᓂᖓᓂᒃ ᐊᕗᖓᐅᓕᔪᑎᒍᓪᓗ ᑮᓇᐅᔭᑎᒍᑦ ᐱᕙᓪᓕᐊᕈᑕᐅᒍᓐᓇᑐᓂᒃ.
ᑕᕐᖁᑎ ᐃᑯᒪᓕᐅᕐᓂᒧᑦ ᑎᒥᖁᑎᒋᔭᐅᔪᖅ
ᑕᕐᖁᑎ ᐃᑯᒪᓕᐅᕐᓂᒧᑦ ᑎᒥᖁᑎᒋᔭᐅᔪᖅ ᐃᓄᓐᓄᑦ ᓇᒻᒥᓂᕆᔭᐅᑦᓱᓂ ᓄᑕᐅᓯᓕᑎᕈᓐᓇᑐᑎᒍᑦ ᐃᑲᒪᓕᐅᕐᑎᐅᓱᓂ ᑲᒻᐸᓂ ᓄᐃᑕᐅᓯᒪᔪᖅ ᓯᕗᓕᕐᓂᐊᓗᓂ ᓴᓗᒪᔪᑎᒍᑦ ᐃᑯᒪᓕᐅᕈᑎᐅᔪᓂᒃ ᓄᓇᕕᓕᒫᒥ. ᓇᒻᒥᓂᕆᔭᐅᔪᖅ ᒪᑭᕝᕕᒧᑦ ᐃᓚᒌᓴᕐᒧᓗ, ᑕᕐᖁᑎ ᐱᓇᓱᐊᖃᑎᖃᓲᖅ ᓄᓇᕕᐅᑉ ᓄᓇᓕᖏᓐᓂᒃ ᐱᕙᓪᓕᐊᑎᑦᓯᖃᑎᐅᑦᓱᓂ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕈᑎᐅᒍᓐᓇᑐᓂᒃ ᐅᕐᓱᐊᓗᕐᑐᑐᓂᒃ ᑕᑎᖃᖕᖏᓂᕐᓴᐅᒍᒪᓂᒃᑯᑦ, ᐃᑲᔪᕐᓯᒪᔨᐅᑦᓱᓂ ᐃᓄᓐᓄᑦ ᓯᕗᓕᕐᑕᐅᔪᓂᒃ ᐱᕙᓪᓕᐊᑎᑕᐅᔪᓂᒃ, ᓄᐃᑎᕆᔨᐅᑦᓱᓂ ᓄᓇᕕᒻᒥ ᑖᕗᖓᓕᔪᑎᒍᑦ ᐱᕙᓪᓕᖁᑎᐅᒍᓇᓂᐊᕐᑐᓂᒃ ᐊᕙᑎᑦᑎᓄᑦ, ᐃᓅᓯᕐᑎᒍᑦ ᑮᓇᐅᔭᑎᒍᓪᓗ.
ᑐᓴᕋᑦᓴᓕᕆᔩᓄᑦ ᖃᐅᔨᒋᐊᕐᕕᓴᖅ
ᑳᓴᓐ ᑕᒍᕐᓈᖅ
Carson.Tagoona@tarquti.ca
Tarquti.ca