(ᑐᓴᕋᑦᓴᖅ ᓄᐃᑕᐃᔪᖅ)
ᑯᐯᒃ, ᐁᕆᓕ 18, 2024 – ᐃᓚᒋᔭᐅᑎᓪᓗᒍ ᐸᕐᓇᕈᑎᓕᐊᖑᒪᔪᒧᑦ ᐊᕙᑎᑦᑎᓂᒃ ᓴᓗᒪᓂᕐᓴᐅᑎᑦᓯᓗᓂ ᑮᓇᐅᔭᓕᐅᕋᓱᐊᕐᓂᒧᑦ 2030, ᑯᐯᒃ ᑲᕙᒪᖓ ᑕᕐᖁᑎᒥᒃ ᑮᓇᐅᔭᑎᒍᑦ ᐃᑲᔪᕐᓯᒪᓂᖃᓯᕗᖅ $7,637,975-ᓂᒃ ᑲᔪᓯᒋᐊᓪᓚᕈᑎᒋᓂᐊᕐᑕᖏᓐᓂᒃ ᓴᐳᒻᒥᓂᒃᑯᑦ ᓄᓇᕕᐅᑉ ᓄᓇᓕᖏᓐᓂᒃ ᐃᑯᒪᓕᐅᕐᓂᑯᑦ ᐊᓯᑦᔨᑎᕆᕙᓪᓕᐊᑎᓪᓗᒋᑦ.
Mr. Pierre Fitzgibbon, ᑐᕐᖃᑕᕐᕕᒋᔭᐅᔪᖅ ᑮᓇᐅᔭᓕᐅᕋᓱᐊᕐᓂᒧᑦ, ᓄᑖᓂᒃ ᓴᕐᕿᑎᕆᓂᕐᒧᑦ ᐃᑯᒪᓕᐅᕐᓂᒧᓪᓗ, ᑐᕐᖃᑕᕐᕕᐅᓱᓂᓗ ᓄᓇᖁᑎᒋᔭᐅᔪᓂ ᑮᓇᐅᔭᑎᒍᑦ ᐱᕙᓪᓕᐊᑎᑦᓯᒐᓱᐊᕐᓂᒧᑦ ᐊᒻᒪᓗ ᑐᕐᖃᑕᕐᕕᖓᓂ ᐃᓪᓗᔪᐊᖃᕐᕕᒪᕆᒻᒥᐅᑦ ᒪᓐᑐᕆᐊᓗ ᓄᓇᖁᑎᖓᓂ; Benoit Charette, ᑐᕐᖃᑕᕐᕕᒋᔭᐅᔪᖅ ᐊᕙᑎᓕᕆᓂᕐᒧᑦ, ᓯᓚᐅᓪᓗ ᐊᓯᑦᔨᐸᓪᓕᐊᓂᖓᓂᒃ ᓴᖕᖓᔨᐅᓂᕐᒧᑦ, ᐅᒪᔪᓕᕆᓂᕐᒧᑦ, ᒥᕐᖑᐃᓯᕐᕕᓕᕆᓂᕐᒧᑦ ᑐᕐᖃᑕᕐᕕᐅᓱᓂᓗ ᒪᓐᑐᕆᐊᑉ ᑕᕐᕋᓯᖓᓂ ᓄᓇᖁᑎᒋᔭᐅᔪᓄᑦ; ᑐᕐᖃᑕᕐᕕᒋᔭᐅᔪᖅ ᐱᓇᓱᐊᖃᑎᖃᕐᓂᒧᑦ ᐊᓪᓚᓂᒃ ᐃᓄᓐᓂᓗ, Mr. Ian Lafreniere; ᑭᒡᒐᑐᕐᑎᓗ ᐅᒐᕙᒥᒃ ᐅᖃᕐᕕᒪᕆᒻᒥᓗ ᐃᑲᔪᕐᑎᒋᔭᐅᑦᓱᓂ ᑐᕐᖃᑕᕐᕕᖓᓄᑦ ᓇᐅᓕᒫᑦ ᐊᑦᑕᓇᕐᑐᒦᑎᑕᐅᑦᑌᓕᓂᖓᓄᑦ, Denis Lamothe, ᖃᐅᔨᔭᐅᑎᑦᓯᖃᐅᕗᑦ ᐅᓪᓗᒥ.
$24.1 ᒥᓕᐊᕌᕐᑐᓗᐊᖑᑦᓱᑎᒃ ᑕᓪᓕᒪᓂ ᐊᕐᕌᒍᓂ, ᑖᒃᑯᐊ ᐊᐅᓚᑦᔭᕆᐊᕈᑕᐅᔪᑦ ᑐᕌᕋᖃᕐᑐᑦ ᐅᕐᓱᐊᓗᑦᑐᑐᓂᒃ ᐃᑯᒪᓕᐅᕈᑎᖃᕐᓂᒥᒃ ᐅᕐᖂᓯᓴᕈᑎᖃᕐᓂᒥᓪᓗ ᐃᑯᓪᓚᕆᐊᕐᑎᓯᒐᓱᐊᕈᑎᐅᑦᓱᑎᒃ ᓄᓇᕕᐅᑉ ᓄᓇᓕᖏᓐᓂ , ᐃᑯᓪᓚᕆᐊᕈᓐᓇᓯᑎᒐᓱᐊᕐᓱᒍ 50%-ᒧᑦ, ᑎᑭᐅᑎᕕᖃᕋᓱᐊᕐᓂᖃᕐᓗᓂ 100%-ᒥᒃ, ᐊᕐᖁᑕᐅᑎᓪᓗᒋᑦ ᐱᒍᓐᓇᓯᑎᑦᓯᕙᓪᓕᐊᕈᑕᐅᔪᑦ ᐱᓇᓱᑦᑐᓂᒃ, ᓄᓇᓕᓐᓂᒃ ᐃᓚᐅᑎᑦᓯᓃᑦ ᐊᒻᒪᓗ ᐱᓇᓱᐊᕋᑦᓴᐅᔪᓂᒃ ᖃᐅᔨᓴᕐᓂᑯᑦ ᐃᓗᓐᓈᒍᑦ ᐊᐅᓚᑦᔭᕆᐊᕈᑎᐅᓚᖓᑎᓪᓗᒍ ᐃᓄᑐᐃᓐᓇᓄᑦ.
ᐅᖃᐅᓯᕆᔭᐅᔪᑦ:
“ᑕᕐᖁᑎᐅᑉ ᐱᓇᓱᐊᕐᑕᖓ ᓇᓛᒍᑦᓯᐊᑐᖅ ᐊᔪᐃᓐᓇᓂᕆᔭᑦᑎᓄᑦ ᓱᑲᓯᐅᒥᑎᑦᓯᒐᓱᐊᕐᓂᑯᑦ ᐃᑯᒪᓕᐅᕐᓂᐅᑉ ᐊᓯᑦᔨᑕᐅᕙᓪᓕᐊᓂᖓᓂᒃ ᐃᑯᓪᓚᑎᑦᓯᒐᓱᐊᕐᓂᑯᓪᓗ ᐅᕐᓱᐊᓗᑦᑐᓂᕐᒥᒃ. ᑕᒪᓐᓇ ᐊᐅᓚᑦᔭᕆᐊᕈᑎᐅᔪᖅ ᐱᕕᖃᕐᑎᓯᓚᖓᔪᖅ ᐳᔪᕐᓗᖃᖕᖏᓂᕐᓴᐅᑎᑦᓯᒍᑎᐅᓗᓂ ᑯᐯᓕᒫᒥ.”
Pierre Fitzgibbon, ᑐᕐᖃᑕᕐᕕᒋᔭᐅᔪᖅ ᑮᓇᐅᔭᓕᐅᕋᓱᐊᕐᓂᒧᑦ, ᓄᑖᓂᒃ ᓴᕐᕿᑎᕆᓂᕐᒧᑦ ᐃᑯᒪᓕᐅᕐᓂᒧᓪᓗ, ᑐᕐᖃᑕᕐᕕᐅᓱᓂᓗ ᓄᓇᖁᑎᒋᔭᐅᔪᓂ ᑮᓇᐅᔭᑎᒍᑦ ᐱᕙᓪᓕᐊᑎᑦᓯᒐᓱᐊᕐᓂᒧᑦ ᐊᒻᒪᓗ ᑐᕐᖃᑕᕐᕕᖓᓂ ᐃᓪᓗᔪᐊᖃᕐᕕᒪᕆᒻᒥᐅᑦ ᒪᓐᑐᕆᐊᓗ ᓄᓇᖁᑎᖓᓂ
“ᑖᓐᓇ ᐱᓇᓱᐊᕐᑕᐅᔪᖅ ᐊᐅᓚᑦᔭᕆᐊᕐᑎᓯᒍᑎᐅᔪᖅ ᑎᑭᐅᑎᕙᓪᓕᐊᒐᓱᐊᕐᓂᒧᑦ ᓴᓗᒪᓂᕐᓴᒧᑦ, ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒧᑦ. ᖁᕕᐊᓲᑎᖃᒻᒪᕆᑉᐳᖓ ᐱᓇᓱᐊᖃᑎᒌᓐᓂᖓᓂᒃ ᑲᕙᒪᑦᑕ ᓄᓇᕕᐅᓪᓗ, ᐱᕕᖃᕐᑎᓯᒍᑎᐅᓚᖓᒻᒪᑦ ᐱᒍᓐᓇᓯᓕᐅᒥᓂᑦᓴᖓᓂᒃ ᓄᓇᓖᑦ ᑯᐯᓪᓗ ᓯᓚᒨᓕᖓᔪᓂᒃ ᑐᕌᕋᒋᒐᓱᐊᕐᑕᖏᓐᓂᒃ ᐱᔭᖃᕐᑎᓯᒍᑎᐅᒍᓐᓇᓱᓂ.”
Benoit Charette, ᑐᕐᖃᑕᕐᕕᒋᔭᐅᔪᖅ ᐊᕙᑎᓕᕆᓂᕐᒧᑦ, ᓯᓚᐅᓪᓗ ᐊᓯᑦᔨᐸᓪᓕᐊᓂᖓᓂᒃ ᓴᖕᖓᔨᐅᓂᕐᒧᑦ, ᐅᒪᔪᓕᕆᓂᕐᒧᑦ, ᒥᕐᖑᐃᓯᕐᕕᓕᕆᓂᕐᒧᑦ ᑐᕐᖃᑕᕐᕕᐅᓱᓂᓗ ᒪᓐᑐᕆᐊᑉ ᑕᕐᕋᓯᖓᓂ ᓄᓇᖁᑎᒋᔭᐅᔪᓄᑦ.
“ᐊᓪᓓᑦ ᐃᓄᐃᓪᓗ ᓄᓇᓕᖏᑦ ᓂᑯᕐᕋᖃᑎᒋᒃᑯᑦ ᓯᕗᓪᓕᐸᐅᑦᓱᑎᒃ ᑕᑯᓐᓇᓂᕐᐸᐅᒐᒥᒃ ᓱᕐᕋᑕᐅᓂᕐᒥᓂᒃ ᓯᓚᐅᑉ ᐊᓯᑦᔨᐸᓕᐊᓂᖓᓄᑦ. ᖃᐅᑕᒫᑦ ᑕᒪᑦᓱᒥᖓ ᐊᑑᑎᔪᑦ. ᑕᒡᒎᓇ ᐊᐅᓚᑦᔭᕆᐊᕈᑕᐅᔪᑎᒍᑦ, ᐃᓄᐃᑦ ᓄᓇᕕᒻᒥᐅᑦ ᐃᑯᓪᓚᕆᐊᕐᑎᓯᒍᓐᓇᓯᓚᖓᔪᑦ ᐅᕐᓱᐊᓗᒥᒃ ᐊᑐᕆᐊᖃᕐᐸᓂᕐᒥᓂᒃ, ᑲᒪᒋᔭᖃᕈᓐᓇᓯᓗᑎᒃ ᐃᑯᒪᓕᐅᕐᓂᐅᑉ ᐊᓯᑦᔨᐸᓪᓕᐊᒍᓐᓇᓂᖓᓂᒃ. ᑕᒪᒃᑯᐊ ᓴᕐᕿᔮᓪᓚᕆᑦᑐᑯᑦ ᐊᔪᐃᓐᓇᓂᐅᔪᑦ ᓄᐃᑕᑎᑦᓯᓯᐊᕈᑎᐅᕗᑦ ᐱᓇᓱᐊᖃᑎᒌᓐᓂᓂᒃ ᐊᐅᓚᑦᔭᕈᑎᐅᒍᒪᔪᓂᒃ ᓴᐳᑎᓯᒪᔭᐅᖁᓪᓗᒍ ᓄᓇᕐᔪᐊᕗᑦ ᐊᒻᒪᓗ ᐱᕙᓪᓕᑎᑦᓯᒍᑎᐅᓗᓂ ᐱᕙᓪᓕᖁᑎᐅᒍᓐᓇᓯᐊᕐᑐᓂᒃ ᐃᓅᓯᕐᑎᒍᑦ-ᑮᓇᐅᔭᑎᒍᓪᓗ ᓄᐃᒍᓐᓇᓂᐊᕐᑐᓂᒃ.”
Ian Lafreniere, ᑐᕐᖃᑕᕐᕕᒋᔭᐅᔪᖅ ᐱᓇᓱᐊᖃᑎᖃᕐᓂᒧᑦ ᐊᓪᓚᓂᒃ ᐃᓄᓐᓂᓗ.
“ᐃᓚᐅᑎᑕᐅᓂᖓᒍᑦ ᐃᓅᖃᑎᒌᑦ, ᓄᓇᓖᑦ ᓄᓇᕕᐅᓪᓗ ᓯᕗᓕᕐᑎᖏᑦ, ᐱᓇᓱᐊᕐᑕᐅᔪᐃᑦ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒧᑦ ᓈᒻᒪᓈᕐᑐᑰᕈᓐᓇᖁᑦ. ᑕᕐᖁᑎᐅᑉ ᐊᐅᓚᑦᔭᕆᐊᕈᑎᒋᓯᒪᔭᖓ ᐱᒻᒪᕆᐅᕗᖅ ᓄᓇᕕᒻᒧᑦ.”
Denis Lamothe, ᑭᒡᒐᑐᕐᑎᓗ ᐅᒐᕙᒥᒃ ᐅᖃᕐᕕᒪᕆᒻᒥᓗ ᐃᑲᔪᕐᑎᒋᔭᐅᑦᓱᓂ ᑐᕐᖃᑕᕐᕕᖓᓄᑦ ᓇᐅᓕᒫᑦ ᐊᑦᑕᓇᕐᑐᒦᑎᑕᐅᑦᑌᓕᓂᖓᓄᑦ
“ᑕᕐᖁᑎᐅᑉ ᑎᒥᖁᑎᖓᑕ ᐱᓇᓱᐊᕐᑕᖏᑦ ᓄᐃᑕᑎᑦᓯᒍᑎᐅᕗᑦ ᐊᔪᐃᓐᓇᓂᑦᑎᓂᒃ ᓯᕗᓕᕐᓂᑯᑦ ᐃᑯᒪᓕᐅᕐᓂᒧᑦ ᐊᓯᑦᔨᐸᓕᐊᒍᑎᐅᒍᓐᓇᑐᓂᒃ ᓄᓇᕕᒻᒥ. ᑕᕐᖁᑎ, ᐱᓇᓱᐊᖃᑎᖃᕐᓱᓂ ᓄᓇᒥᒃ ᑎᒍᒥᐊᕐᑎᓂᒃ, ᐊᐅᓚᑦᓯᒍᓐᓇᓂᕐᓴᐅᑎᑦᓯᕗᖅ ᐅᕙᑦᑎᓂᒃ ᐱᕙᓕᐊᓂᐅᔪᓂᒃ ᓄᓇᑦᑎᓂ, ᓲᓱᒋᔭᖃᑦᓯᐊᓱᓂ ᐊᕙᑎᑦᑎᓂᒃ.”
ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᖄᖓ
“ᑕᕐᖁᑎ ᐃᑦᔭᕋᑦᓴᓯᐊᒻᒪᕆᐅᕗᖅ ᓄᓇᕕᒻᒥ. ᐱᕙᓪᓕᐊᑎᑦᓯᔪᖅ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᐱᓇᓱᐊᕐᓱᓂ ᐊᑐᓂ ᓄᓇᓕᐅᔪᑦ ᐅᓇᒻᒥᓱᒍᑎᖏᑦ ᖃᓄᐃᓘᕈᒪᓂᖏᓪᓗ ᒪᓕᑦᓱᒋᑦ, ᐊᒻᒪᓗ ᐃᓄᓯᕐᑎᒍᑦ-ᑮᓇᐅᔭᑎᒍᓪᓗ ᐱᕙᓪᓕᓯᐊᖁᓪᓗᒋᑦ ᐃᓚᐅᔪᖁᑎᕗᑦ.”
ᑯᓗ ᑐᑲᓚᒃ, ᐃᓚᒋᓴᐅᑉ ᑲᑎᒪᔨᖏᓐᓂ ᐊᖓᔪᕐᖄᖅ
ᐱᒻᒪᕆᑦᑕᕆᔭᐅᔪᑦ:
- $8 ᒥᓕᐊᓐ ᑲᕙᒪᐅᑉ ᑐᓂᔭᕕᓂᖏᑦ ᑕᕐᖁᑎᒧᑦ 2022-ᖑᑎᓪᓗᒍ ᓴᐳᒻᒥᒍᑎᐅᑦᓱᑎᒃ ᐱᕙᓪᓕᐊᔭᐅᒐᓱᐊᕐᓂᖓᓂᒃ ᐃᑯᒪᓕᐅᕐᓂᒧᑦ ᐸᕐᓇᕈᑕᐅᔪᓂᒃ ᓄᓇᕕᒻᒥ ᐊᑦᓱᓈᑎᒍᑦ ᐱᑐᑦᓯᒪᖕᖏᑐᓂᒃ ᓄᓇᓕᓐᓂᒃ, ᐊᒻᒪᓗ ᐊᕙᑎᒥᒃ, ᓴᓇᔭᐅᒍᑎᐅᒍᓐᓇᑐᓂᒃ ᑲᔪᓯᒍᓐᓇᓯᐊᕐᓂᐊᕋᓗᐊᕐᒪᖔᑕᓗ ᖃᐅᔨᓴᕈᑎᐅᔪᓂᒃ ᐃᓕᖓᔪᓂᒃ ᓄᑕᐅᓯᓕᑎᕈᓐᓇᓂᒃᑯᑦ ᐃᑯᒪᓕᐅᕈᑎᐅᒍᓐᓇᑐᓄᑦ. ᑯᐯᑉ ᑲᕙᒪᖓᑕ ᐃᑲᔪᕐᓯᒋᐊᓪᓚᐅᑎᖓ ᐱᕈᕐᓭᒋᐊᓪᓚᒍᑎᐅᓚᖓᔪᖅ ᐱᓇᓱᐊᕐᑕᐅᔪᓂᒃ, ᐃᓚᐅᓕᕐᑎᓯᓂᒃᑯᑦ ᐱᖓᓱᒋᐊᓪᓚᓂᒃ ᓄᓇᓕᓐᓂᒃ ᑕᓪᓕᒪᑦ ᓄᓇᓖᑦ ᐱᒋᐊᕐᑎᓯᕕᐅᓯᒪᓕᕐᑎᓗᒋᑦ. ᑕᕐᖁᑎ ᑲᒪᒋᔭᖃᕐᑎᑕᐅᔪᖅ ᖃᐅᔨᓴᕐᓂᐅᔪᓂᒃ ᐃᓕᖓᓂᐊᕐᑐᓂᒃ ᑖᒃᑯᓄᖓ ᐃᓚᐅᒋᐊᓪᓚᑎᑕᐅᓯᔪᓄᑦ ᓄᓇᓕᓐᓄᑦ.
- ᑕᕐᖁᑎ ᐱᓇᓱᐊᖃᑎᒌᕝᕕᐅᔪᖅ ᒪᑭᕝᕕᒧᑦ ᐃᓚᒌᓴᕐᒧᓗ ᑎᓕᔭᐅᒪᐅᑎᖃᕐᓱᓂ ᓯᕗᓕᓚᖓᓂᕐᒥᒃ ᐊᓯᑦᔨᑎᕆᕙᓪᓕᐊᓂᕐᒥᒃ ᓴᓗᒪᓂᕐᓴᒧᑦ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᐊᑐᓂ ᓄᓇᕕᐅᑉ ᓄᓇᓕᖁᑎᖏᓐᓂ.
- 2020-ᒥ, ᑯᐯᑉ ᑲᕙᒪᖓ ᓄᐃᑦᓯᓚᐅᔪᕗᖅ ᐸᕐᓇᓯᒪᐅᑎᒥᒃ ᐊᕙᑎᑦᑎᓂᒃ ᓱᒃᑯᑎᕆᓂᖃᖕᖏᑐᑯᑦ ᑭᓇᐅᔭᓕᐅᕋᓱᐊᕐᓂᒨᓕᖓᔪᒥᒃ, the Plan pour une économie verte 2030. ᑖᓐᓇ ᑐᕌᕋᖃᕐᑐᖅ ᐃᑲᔪᕐᓯᒍᒪᓂᕐᒥᒃ ᑯᐯᑉ ᑎᑭᐅᑎᒐᓱᐊᕐᑕᖓᓂᒃ 37.5%-ᒧᑦ ᐃᑯᓪᓚᐅᒥᑎᑦᓯᒐᓱᐊᕐᕈᑎᖓᓂᒃ ᐳᔪᓗᑲᐅᔪᓂᒃ 2030-ᖑᓕᕐᐸᑦ, 1990-ᒥ ᐳᔪᓗᑲᐅᔪᕕᓃᑦ ᑕᑯᓐᓇᓱᒋᑦ ᐊᒻᒪᓗ ᐳᔪᓗᑲᖃᕈᓐᓀᒐᔭᕈᒪᓂᖃᕐᓱᓂ 2050-ᐅᓕᕐᐸᑦ.
- ᐊᐅᓚᑦᔭᕆᐊᕈᑎᒃ 1.10.1.1 ᐸᕐᓇᓯᒪᐅᑎᓕᐊᖑᒪᔪᒥᒃ 2023-2028 Plan de mise en œuvre 2023-2028 ᐊᕙᑎᑦᑎᓂᒃ ᓱᒃᑯᑎᕆᖕᖏᓂᒃᑯᑦ ᑮᓇᐅᔭᓕᐅᕋᓱᐊᕐᓂᒧᑦ, ᑲᕙᒪ ᑐᕌᕋᖃᕐᐳᖅ ᓴᐳᑦᔨᓯᒪᒍᒪᓂᕐᒥᒃ ᐃᑯᒪᓕᐅᕈᑎᓄᑦ ᐊᑦᓱᓈᓄᑦ ᐱᑐᑦᓯᒪᖕᖏᑐᓂᒃ ᓄᓇᓕᓐᓂᒃ ᐱᕙᓪᓕᐊᑎᑦᓯᒐᓱᐊᕐᑎᓗᒋᑦ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᐅᔪᓂᒃ. ᐊᒻᒪᓗᑦᑕᐅᒃ, $25 ᒥᓕᐊᓐ ᑕᓪᓕᒪᓄᑦ ᐊᕐᕌᒍᕐᓅᓕᖓᔪᑦ ᓇᓗᓀᕐᑕᐅᓯᒪᒻᒥᔪᑦ 2020-2021-ᒥ ᑮᓇᐅᔦᑦ ᑐᕌᕋᖏᓐᓂ ᑲᔪᖏᕐᓭᒍᑎᐅᑦᓱᑎᒃ ᐃᑯᒪᓕᐅᕐᓂᑯᑦ ᐊᓯᑦᔨᑎᕆᕙᓪᓕᐊᓂᕐᒥᒃ ᐊᑦᓱᓈᓄᑦ ᐱᑐᑦᓯᒪᖕᖏᑐᒥᐅᓂ.
- ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒧᑦ ᐱᓇᓱᐊᕐᑕᐅᔪᑦ ᑕᕐᖁᑎᒧᑦ ᓄᓇᕕᒻᒥ ᐃᑲᔪᕐᓯᒪᒍᑎᐅᓚᖓᔪᑦ ᐱᕈᕐᑎᓯᕙᓪᓕᐊᒍᑎᐅᓗᑎᒃ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᑯᐯᒃᑯᑦ ᐃᑯᒪᓕᐅᕐᑎᖏᑦᑕ ᐱᑐᑦᓯᒪᖕᖏᑐᑎᒍᑦ ᐃᑯᒪᖃᕐᑎᓯᕕᖏᓐᓂ.
ᑕᑯᒋᐊᕆᑦ ᖃᕆᑕᐅᔭᕐᑎᒍᑦ ᑐᕐᖃᑕᕐᕕᒋᔭᐅᔪᒥᒃ ᑮᓇᐅᔭᓕᐅᕋᓱᐊᕐᓂᒧᑦ, ᓄᑖᓂᒃ ᓴᕐᕿᑎᕆᓂᕐᒧᑦ ᐃᑯᒪᓕᐅᕐᓂᒧᓪᓗ:
- twitter.com/economie_quebec
- facebook.com/EconomieQc
- linkedin.com/company/économie-québec
- youtube.com/c/ÉconomieQuébec
- instagram.com/economieqc
-30-