ᔫᓂ 12, 2024-ᒥ, ᑕᕐᖁᑎ ᑐᓂᔭᐅᓚᐅᕐᖁᖅ ᓄᓇᓕᒻᒥ ᐃᑯᒪᓕᐅᕐᓂᒥᒃ ᐱᒋᐊᕐᑎᓯᓯᒪᓂᕐᒧᑦ ᐃᓕᑕᕆᔭᐅᒍᑎᒥᒃ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᐃᓕᑕᕐᓯᓂᖅ ᖁᕕᐊᓲᑕᐅᑎᓪᓗᒍ, ᑖᓐᓇ ᑲᔪᓯᑎᑕᐅᓚᐅᕐᑐᖅ NERGICA-ᑯᓐᓄᑦ ᐃᓚᒋᔭᐅᑦᓱᓂ ᑲᑎᒪᒍᑕᐅᓂᖓᓄᑦ ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᐅᑉ ᑯᐯᒻᒥ. ᓄᓇᓕᒻᒥ ᐃᑯᒪᓕᐅᕐᓂᒥᒃ ᐱᒋᐊᕐᑎᓯᓯᒪᓂᕐᒧᑦ ᐅᐱᒍᓲᑎᒃ ᐃᓕᑕᕐᓯᒍᑕᐅᕗᖅ ᐃᑦᔭᕋᑦᓴᓯᐊᖑᔪᓂᒃ ᓄᓇᓕᒻᒥ ᐃᑯᒪᓕᐅᕐᓂᒥᒃ ᐱᒋᐊᕐᑎᓯᕙᑦᑐᓂᒃ ᑯᐯᓕᒫᒥ.
ᑕᒡᒐᓂ ᑲᑎᓐᓂᐅᔪᒥ, ᐊᒥᓱᒐᓓᑦ ᑕᕐᖁᑎᒥᐅᑦ ᐁᓯᒪᓚᐅᕐᑐᑦ Carleton-sur-Mer-ᒥ ᐅᐱᒍᓲᑎᑖᕆᐊᕐᑐᓱᑎᒃ: ᑐᖕᖓᕕᖃᖃᑎᐅᔪᓂ ᑭᒡᒐᑐᕐᑎ ᒫᒃ ᐱᓕᐊ ᒣᑯ ᑲᒧᕋᓐᓗ, ᑕᕐᖁᑎᐅᑉ ᑲᒪᔨᒻᒪᕆᖓ ᔪᐃ ᓛᓐᔅ, ᓄᓇᓕᓐᓂᒃ ᐱᓇᓱᐊᖃᑎᖃᕐᓂᒧᑦ ᖀᓇᐅᔭᓕᐅᕋᓱᐊᕐᓂᒥᓪᓗ ᐱᕙᓪᓕᐊᑎᑦᓯᓂᕐᒧᑦ ᑲᒪᔨ ᐋᓐᑎ ᐲᕐᑎ, ᓄᓇᓕᒻᒥ ᐊᔪᐃᓐᓇᑏᒃ ᐃᐅᔩᓐ ᐳᑐᒍ ᔮᓂ ᓇᓴᕐᓗ ᐊᒻᒪᓗ ᐱᓇᓱᐊᕐᑕᐅᔪᓂᒃ ᐱᕙᓪᓕᐊᑎᑦᓯᔨ ᔭᔅᑎᓐ ᐳᓗᑕ.
ᐃᓕᑕᕆᔭᐅᔪᑦ ᑎᒃᑯᐊᑕᐅᔪᕕᓃᑦ ᕿᒥᕐᕈᔨᐅᔪᓄᑦ ᑐᖕᖓᕕᐅᑎᓪᓗᒋᑦ ᓄᑖᕕᖓᒥᒃ ᓄᐃᑎᕆᓂᐅᔪᖅ, ᐱᔭᕆᐊᑐᔫᓕᕆᓂᖅ ᐊᒻᒪᓗ ᑲᔪᓯᑦᓯᐊᕈᓐᓇᑑᓂᖅ. ᐃᓚᒋᔭᐅᑎᓪᓗᒍ ᓄᓇᓕᒻᒥ ᐃᑯᒪᓕᐅᕐᓂᒥᒃ ᐱᒋᐊᕐᑎᓯᓯᒪᓂᕐᒧᑦ, ᑖᒃᑯᐊ ᕿᒥᕐᕈᔨᐅᔪᑦ ᓇᓪᓕᑳᑦᑏᑦ ᐊᐅᓚᑦᔭᑕᐅᓂᖃᓚᐅᕐᑐᑦ ᑕᕐᖁᑎᐅᑉ ᕿᑦᑌᖓᓂᖓᓄᑦ ᐱᕙᓪᓖᓯᒪᓪᓚᕆᕐᓂᖓᓄᓪᓗ ᐱᓇᓱᐊᕐᓂᒥᒍᑦ ᓯᕗᓕᕐᓱᑎᒃ ᐃᑯᒪᓕᐅᕈᓯᕐᒥᒃ ᐊᓯᑦᔨᑎᕆᒐᓱᐊᕐᓂᒥᒃ ᓄᓇᕕᒻᒥ ᐊᓯᖏᓐᓂᓗ ᓄᓇᓂ. ᐊᔪᐃᓐᓇᐅᑎᖃᕐᓂᒥᒍᑦ ᐃᓅᓯᕐᑎᒍᑦ ᒪᑭᑕᒐᓱᐊᕐᓂᑯᓪᓗ ᐱᕙᓪᓕᖁᑎᐅᔪᑦ ᐱᓇᓱᐊᕐᑕᐅᔪᓂ ᓄᓇᕕᒻᒦᖏᓐᓇᑎᑦᓱᒋᑦ ᐊᒻᒪᓗ ᐱᕈᕐᓭᓂᒃᑯᑦ ᓄᓇᕕᒻᒥᐅᑦ ᐱᓯᑎᖕᖑᐸᓪᓕᐊᒍᑎᑦᓴᖏᓐᓂᒃ, ᑕᕐᖁᑎ ᐃᓂᓪᓚᑎᕆᕗᖅ ᑐᖕᖓᕕᑦᓴᐅᒐᔭᕐᑐᓂᒃ ᑲᔪᓯᑦᓯᐊᕈᓐᓇᑐᓄᑦ ᐃᑯᒪᓕᐅᕐᓂᐅᑉ ᓯᕗᓂᕆᓂᐊᕐᑕᖏᓐᓄᑦ ᓄᓇᕕᐅᑉ ᓄᓇᓕᓕᒫᖏᓐᓂ.
ᖃᐅᔨᒋᐊᑦᓯᐊᕈᒪᒍᕕᑦ 2024 ᓄᑕᐅᓯᓕᑎᕈᓐᓇᑐᑎᒍᑦ ᐃᑯᒪᓕᐅᕐᓂᒥᒃ ᐃᓕᑕᕐᓯᓂᐅᑉ ᖁᕕᐊᓲᑕᐅᒍᑎᖓᓂᒃ ᐊᒻᒪᓗ ᐊᓯᖏᑦ ᐅᐱᒍᓱᒍᑎᐅᔪᑦ ᐃᓕᑕᕐᓯᒍᑎᐅᔪᓪᓗ ᒥᑦᓵᓄᑦ, ᐅᓇ ᓃᓂᕐᓗᒍ click here.