ᑳᔅᐱᒥ (GASPÉ-ᒥ), ᔫᓂ 15-ᒍᑎᓪᓗᒍ, 2022-ᒥ – ᓱᓀᓂᒃᑯᐊ ᐱᐅᓯᕐᓴᐅᒐᔭᕐᑐᑦ ᐅᕐᓱᐊᓗᑦᑐᓲᒍᑦᓱᑎᒃ ᐃᑯᒪᓕᐅᕈᑎᐅᓲᓂᒃ, ᒥᓕᐊᓂᒃ ᖃᓪᓗᑎᓂᒃ ᐅᕐᓱᐊᓗᑦᑐᓲᒍᒻᒪᑕ ᐊᕐᕌᒍᑕᒫᑦ ᐃᑯᒪᐅᑎᓄᑦ? ᑯᐯᒻᒥᐅᑦ ᑲᓇᑕᒥᐅᓪᓗ ᓄᑖᓂᒃ ᐃᑯᒪᓕᐅᕈᓐᓇᐅᑎᑦᓴᓂᒃ ᐱᒍᒪᓂᖃᑦᓯᐊᓱᑎᒃ ᖃᓄᕐᑑᕈᑎᖃᓪᓚᕆᒻᒪᑕ, ᓄᓇᓕᐊᕈᕐᓂᒃ ᐃᑯᒪᐅᑎᓄᑦ ᐱᑐᑦᓯᒪᖕᖏᑐᓂᒃ ᐅᕐᓱᐊᓗᑦᑐᖏᓐᓂᓴᓄᑦ ᐊᓯᑦᔨᔭᐅᖁᔨᑦᓱᑎᒃ ᓯᕗᓪᓕᐸᐅᑦᔨᒐᓱᐊᓚᕿᓯᒪᕗᑦ. ᑌᒣᓐᓂᖏᓐᓄᑦ, ᑕᕐᖁᑎ ᐆᒪᖁᑎᓕᕆᔩᑦ ᑯᐊᐳᕇᓴᖓ (‘ᑕᕐᖁᑎ ᓚᔭᐅᖃᑦᑕᓚᖓᔪᑦ’), ᑯᐯᒻᒥ ᐃᑯᒪᓐᓂᐊᑎᒃᑯᑦ ᐊᒻᒪᓗ ᐃᑯᒪᓕᐅᕈᑕᐅᒍᓐᓇᑐᓂᒃ ᖃᐅᔨᓴᕐᑏᑦ Nergica-ᑯᑦ ᖃᐅᔨᓴᕐᓂᑯᑦ ᐊᖏᔪᕐᓚᕋᑕᕐᓂᒃ ᐱᓇᓱᐊᖃᑎᒌᓚᖓᔪᑦ ᓄᓇᓕᐊᕈᕐᓂᒃ ᐃᑯᒪᐅᑎᓄᑦ ᐱᑐᑦᓯᒪᖕᖏᑐᓂᒃ ᓄᓇᕕᒻᒥ ᐅᕐᓱᐊᓗᑦᑐᖏᑦᑐᓂᒃ ᐃᑯᒪᓕᐅᕈᑎᑖᕐᑎᓯᒐᓱᐊᕐᓗᑎᒃ.
ᐱᐅᒃᑯᑎᑐᖃᐅᓕᕐᑐᐃᑦ ᐱᐅᑦᓯᐊᖏᑦᑐᕋᑕᐅᓕᕐᒪᑕ ᓄᓇᕕᒻᒥᐅᑦ ᐃᓅᖃᑎᒌᒐᓱᐊᕈᑎᒋᒋᐊᓕᖏᓐᓄᑦ, ᐱᓪᓗᑯᑦᑕᐅᒋᐊᓕᓐᓄᓗ, ᐊᒻᒪᓗ ᒪᑭᑕᒐᓱᐊᕈᑎᐅᒋᐊᓕᓐᓄᑦ ᐃᒃᑭᓇᕐᑐᒥᐅᒍᓂᖏᓐᓄᓗ ᐱᕕᑦᓴᓯᐊᖑᒍᓀᒪᑕ ᓄᓇᕕᒻᒥᐅᓄᑦ, ᓇᐅᑦᓯᑐᕋᓱᐊᕆᐊᒥᓪᓗ ᓇᓗᓇᓕᕐᓱᑎᒃ ᐊᒻᒪᓗ ᒪᑭᑉᐸᓕᐊᒐᓱᐊᕈᑎᑦᓴᐅᔭᒍᓐᓀᓱᑎᒃ ᓄᑖᒍᓂᕐᓴᓄᑦ ᐃᑯᒪᓕᐅᕐᓂᑯᑦ ᐱᓇᓱᐊᕐᑕᐅᒍᒪᔪᓄᑦ. ᑕᒪᒃᑯᐊ ᐱᓇᓱᐊᖃᑎᒋᓪᓗᑎᒃ ᐃᑲᔪᕐᑎᒌᓚᖓᔪᐃᑦ ᐱᕙᓪᓕᐊᒍᑕᐅᓚᖓᔪᑦ ᓄᑖᓂᒃ ᑕᒪᒃᑯᐊ ᐱᕕᑦᓴᓯᐊᖑᒍᓐᓀᑐᐃᑦ ᐃᓱᒪᒋᓗᒋᑦ, ᓄᑖᒍᑦᓱᑎᒃ ᖃᐅᔨᒪᔭᐅᓕᕐᑐᓂᒃ ᐱᕙᓪᓕᐊᒍᑎᑦᓴᐅᒍᓐᓇᑐᓂᒃ ᖃᐅᔨᑎᑕᐅᖃᑦᑕᑎᓪᓗᒋᑦ ᓄᓇᓖᑦ ᓄᓇᓕᓕᒫᓂ.
“ᐃᑯᒪᓕᐅᕈᑕᐅᒍᓐᓇᑐᓂᒃ ᖃᐅᔨᓴᕐᑏᑦ Nergica-ᑯᑦ ᐅᐱᒍᓱᑉᐳᑦ ᑕᒪᑦᓱᒥᖓ ᖃᐅᔨᓴᕐᓂᐅᓚᖓᔪᒥᒃ ᐃᑲᔪᕐᓯᒪᓚᖓᓂᕐᒥᓂᒃ ᖁᕝᕙᑎᑦᓯᒍᑕᐅᓚᖓᒻᒪᑦ ᓄᓇᕕᒻᒥ ᐃᑯᒪᐅᑎᒋᔭᐅᓲᑐᙯᑦ ᐊᓯᑦᔨᑕᐅᕙᓪᓕᐊᓚᖓᒻᒪᑕ. ᑐᑭᓯᔭᐅᑎᑦᓯᒋᐊᑦᓯᐊᕈᒪᕗᖓ ᐱᓇᓱᖃᑎᒋᓚᖓᔭᕗᑦ ᑕᕐᖁᑏᒃᑯᑦ ᑐᓂᓯᒪᓪᓚᕆᓐᓂᖏᓐᓂᒃ ᐊᕙᑎᒧᑦ ᐱᐅᓂᕐᓴᓂᒃ ᐃᑯᒪᓕᐅᕈᑎᑦᓴᓂᒃ ᓄᓇᓕᓕᒫᓂ ᐱᓇᓱᐊᕈᒪᓂᕐᒥᓄᑦ ᐊᔪᐃᓐᓇᓚᕿᒻᒪᑕ ᐊᒻᒪᓗ ᐃᓚᒋᔭᐅᑎᑦᓯᓯᐊᕐᓱᑎᒃ ᓄᓇᓕᓐᓂᒃ. ᑕᒪᓐᓇ ᖃᐅᔨᓴᕐᓂᑯᑦ ᐱᓇᓱᐊᕐᓂᐅᓚᖓᔪᖅ ᐃᓄᓐᓂᒃ ᓲᖑᓯᐅᒥᑎᑦᓯᒋᓪᓚᕈᑎᐅᓚᖓᔪᖅ ᑐᑭᓯᒪᓕᐅᒥᒍᓐᓇᓯᓂᐊᕐᒪᑕ ᐃᓄᐃᑦ ᐱᓪᓗᑯᒋᐊᓖᑦ ᐊᑐᕐᑕᐅᒍᓐᓇᓂᖏᓐᓂᒃ, ᐊᒻᒪᓗ ᐱᕕᑦᓴᓯᐊᒍᖕᖏᓂᖏᓐᓂᒃ.” ᑌᒣᓕᑦᓱᓂ ᖃᐅᔨᓴᕐᑏᑦ Nergica-ᑯᑦ ᑲᒪᔨᒻᒪᕆᖓ Frédéric Côté ᐅᖃᓚᐅᔪᖅ. ᐊᒻᒪᓗᒋᐊᓪᓚᒃ, ᑯᐯᒻᒥ ᐃᑯᒪᓐᓂᐊᑎᒃᑯᑦ ᐱᓇᓱᐊᖃᑎᒋᓚᖓᒻᒥᔭᖏᑦ ᖃᐅᔨᒪᓂᖃᓪᓚᕆᒻᒪᑕ ᓄᓇᓕᐊᕈᐃᑦ ᐃᑯᒪᐅᑎᓄᑦ ᐱᑐᑦᓯᒪᖕᖏᒪᑕ, ᓈᒻᒪᓂᕐᓴᓂᒃ ᖃᐅᔨᒪᓂᖃᓪᓚᕆᒻᒪᑕ ᐅᖓᓯᑦᑐᒥᐅᓄᑦ,” ᑌᒣᓕᒋᐊᓪᓚᓱᓂ ᐅᖃᓚᐅᔪᒻᒥᔪᖅ, Mr. Côté.
ᐃᓘᓐᓈᒍᓕᖓᓂᕐᓭᓕ ᐅᖃᕐᓗᒋᑦ, ᑕᒪᑦᓱᒥᖓ ᖃᐅᔨᓴᕐᓂᐅᓚᖓᔪᒥᒃ ᐱᓇᓱᐊᕐᓂᐅᓚᖓᔪᖅ ᐃᑲᔪᕐᓯᓚᖓᔪᖅ ᖃᐅᔨᒪᓕᐅᒥᒍᑕᐅᓚᕿᓚᖓᒻᒪᑦ ᐱᐅᓯᐅᒥᑎᑦᓯᒋᐊᕈᑎᐅᓗᓂᓗ ᐱᓇᓱᐊᕈᓯᐅᓲᓂᒃ ᐊᒻᒪᓗ ᐱᓪᓗᑯᒋᐊᓕᓐᓂᒃ ᐊᕙᑎᒧᑦ ᐱᐅᓂᕐᓴᓂᒃ ᐊᑐᓕᕐᐸᓕᐊᒍᑎᐅᓗᓂ ᓄᓇᓕᐊᕈᕐᓄᑦ ᐃᑯᒪᐅᑎᓄᑦ ᐱᑐᑦᓯᒪᖕᖏᑐᓄᑦ ᐅᑭᐅᕐᑕᑐᒥᐅᑦ ᑎᑭᑕᐅᑲᓪᓚᑐᐃᓐᓇᖃᔭᖕᖏᑐᒥᐅᒍᑦᓱᑎᒃ ᐅᖓᓯᑦᑐᒥ ᓄᓇᓕᓐᓄᑦ.
“ᐃᑯᒪᓕᐅᕈᑕᐅᒍᓐᓇᑐᓂᒃ ᖃᐅᔨᓴᕐᑏᑦ Nergica-ᑯᑦ ᓱᓕᓪᓚᕆᑦᓱᑎᒃ ᑎᒥᐅᔫᕗᑦ ᓴᓗᒪᓂᕐᓴᓂᒃ ᐃᑯᒪᓕᐅᕈᑎᐅᒍᓐᓇᑐᓂᒃ ᖃᐅᔨᓴᕐᑎᐅᓱᑎᒃ, ᐊᒻᒪᓗ ᓄᓇᕐᔪᐊᒥᐅᓄᑦ ᐃᓕᑕᕆᔭᐅᓂᖃᕐᓱᑎᒃ ᐱᐅᓂᕐᓴᓂᒃ ᓄᐃᑦᓯᒐᓱᐊᓲᒍᓂᖏᑦ ᐊᒻᒪᓗ ᑐᓂᓯᒪᑦᓯᐊᓱᑎᒃ ᐃᑯᒪᓕᐅᕈᑎᓂᒃ ᐊᓯᑦᔩᒐᓱᐊᕐᓂᓄᑦ ᐆᓀᑦᑐᒥ ᐃᒃᑮᓇᕐᑐᐊᓗᒻᒥ ᓇᔪᒐᓕᓐᓂᒃ. ᑌᒣᒻᒪᑦ ᐅᐱᒪᓪᓚᕆᑉᐳᒍᑦ ᑕᕐᖁᑏᒃᑯᑦ ᐱᓇᓱᖃᑎᒌᑦᑐᖁᑎᖏᑦ ᐱᕙᓪᓕᖁᑎᖃᕈᓐᓇᓚᖓᒻᒪᑕ Nergica-ᑯᑦ ᖃᐅᔨᒪᓂᖃᓪᓚᕆᑦᑐᓂᒃ ᓴᐳᒻᒥᒍᓐᓇᓯᐊᕐᑐᓂᓪᓗ ᐱᓯᑎᐅᑦᓱᑎᒃ ᐱᓇᓱᒍᓐᓇᓯᐊᕐᑐᓂᒃ ᐱᓇᓱᑦᑎᖃᕐᒪᑕ ᖃᐅᔨᓴᕐᕕᒥ, ᐱᒋᐊᕐᑎᓯᒍᑎᐅᓚᖓᔪᓂᒃ ᐃᑯᒪᐅᑎᐅᓲᑦ ᐊᓯᑦᔨᔭᐅᕙᓪᓕᐊᑎᓪᓗᒋᑦ ᓄᓇᕕᒻᒥ ᐊᒻᒪᓗ ᖃᐅᔨᒪᓂᕐᒥᓂᒃ ᐃᓕᑦᓯᔭᐅᑎᑦᓯᒐᓱᐊᓚᖓᑦᓱᑎᒃ ᓄᓇᓕᒻᒥ ᐱᓇᓱᐊᖃᑎᒋᑦᑐᓄᑦ,” ᑌᒣᓕᑦᓱᓂ ᑕᕐᖁᑏᒃᑯᑦ ᑲᒪᔨᒻᒪᕆᖓ Jöe Lance ᐅᖃᓚᐅᔪᖅ.
“ᑕᒪᓐᓇ ᐱᓇᓱᐊᖃᑎᒌᒍᑕᐅᓚᖓᔪᖅ ᖁᕝᕙᑎᑦᓯᒍᑎᐅᓚᖓᔪᖅ ᐊᒻᒪᓗ ᓱᑲᑦᓯᐅᒥᑎᑦᓯᒍᑎᐅᓗᓂ ᓄᑖᒍᓂᕐᓴᓂᒃ ᐃᑯᒪᐅᑎᑖᕋᓱᐊᕐᓂᐅᓚᖓᔪᓂᒃ ᓄᓇᕕᒻᒥ. ᑕᒪᓐᓇ ᐱᒻᒪᕆᐊᓗᕋᑕᐅᓚᖓᔪᖅ ᐱᒋᐊᕐᑎᓯᒍᑎᐅᓚᖓᒻᒪᑦ ᐅᕐᓱᐊᓗᑦᑐᑐᓂᒃ ᐊᑐᕈᓐᓀᓕᐅᒥᑎᑦᓯᒐᓱᐊᕐᓂᓄᑦ ᖃᓂᓪᓕᐅᒥᒍᑎᐅᓚᖓᒻᒪᑦ ᑐᕌᕐᑕᐅᒍᒪᔪᓄᑦ ᐊᒻᒪᓗ, ᐊᖏᓕᐅᒥᑎᑦᓯᒍᑎᐅᓚᖓᑦᓱᓂ ᓄᓇᕐᔪᐊᒥ ᑳᓴᓖᑦ ᐳᔪᕐᓂᓗᖏᓐᓄᑦ ᐃᑯᓪᓚᐅᒥᑎᑦᓯᒐᓱᐊᕐᓂᓄᑦ. ᖃᐅᔨᓴᕐᓃᑦ ᐊᓯᑦᔩᒐᓱᐊᕐᓂᐅᓚᖓᔪᓂᒃ ᐊᒻᒪᓗ ᐊᑦᔨᒌᖕᖏᑐᓂᒃ ᐃᑯᒪᓕᐅᕈᑎᑦᓴᐅᒐᔭᕐᑐᓂᒃ ᖃᐅᔨᓴᕐᓃᑦ ᐃᑉᐱᒋᔭᐅᑦᓯᐊᕆᐊᖃᓚᖓᔪᑦ, ᐊᒻᒪᓗ ᑕᒪᑦᓱᒥᖓ ᐱᓇᓱᐊᕐᓂᖅ ᓱᑲᑦᓯᐅᒥᑎᑦᓯᓚᕆᓚᖓᑦᓱᓂ ᐊᑑᑎᔭᐅᒍᒪᔪᐃᑦ ᐃᓗᐃᑦᑐᖑᕐᐸᓕᐊᑎᒐᓱᕐᓗᒋᑦ ᓲᓱᒋᔭᐅᑦᓭᓇᕐᑎᓗᒋᑦ ᐱᒻᒪᕆᐅᔪᖁᑎᒋᔭᐅᔪᐃᑦ ᓄᓇᓕᒻᒥᐅᓄᑦ,” ᑌᒣᓕᑦᓱᓂ ᑐᑭᓯᔭᐅᑎᑦᓯᒋᐊᑦᓯᐊᓚᐅᔪᖅ Patrick Labbé, ᓯᕗᓕᕐᑎᒋᔭᐅᓲᖅ ᓄᑖᒍᑦᓱᑎᒃ ᐱᒻᒪᕆᐅᑦᓱᑎᒃ ᓄᐃᑕᐅᒐᓱᐊᕈᒪᔪᓂᒃ ᐊᒻᒪᓗ ᑯᐯᒻᒥ ᐃᑯᒪᓐᓂᐊᑎᒃᑯᑦ ᐊᓯᑦᔩᒐᓱᐊᕐᓂᖏᓐᓂᒃ ᓄᓇᓕᐊᕈᕐᓂ ᐃᑯᒪᐅᑎᓄᑦ ᐱᑐᑦᓯᒪᖕᖏᑐᓂᒃ ᐱᓕᕆᔨᖏᑦᑕ ᐱᓇᓱᐊᕐᕕᖓᓂ.
ᐊᕐᕌᒍᓂ ᐱᖓᓱᓂ ᐱᓇᓱᐊᕐᓂᐅᓚᖓᔪᖅ ᓇᐅᑦᓯᑐᕐᑕᐅᓯᒪᔪᖅ 1 ᒥᓕᐊᕌᒐᔭᕐᑎᓗᒍ ᑕᒪᑦᓱᒥᖓ ᐱᓇᓱᐊᕐᓂᖅ. ᓇᑯᕐᒦᒍᒪᕗᒍᑦ ᐅᐱᒍᓱᓐᓂᑎᓐᓂᒃ ᐱᐅᓯᕐᓱᕈᓯᕐᓂᒃ ᖃᐅᔨᓴᒻᒪᕆᑦᑎᐅᓱᑎᒃ ᐊᒻᒪᓗ ᐱᓪᓗᑯᒋᐊᓕᓐᓂᒃ ᓴᓇᒻᒪᓕᐅᕈᑎᑦᓴᓂᒃ ᖃᐅᔨᓴᕐᓂᓄᑦ ᑲᑎᒪᔨᖏᓐᓂᒃ ᑲᕙᒪᑐᖃᒃᑯᑦ, ᑯᐯᒻᒥᓗ ᐃᑯᒪᓐᓂᐊᑎᒃᑯᓂᒃ ᐊᒻᒪᓗ ᑕᕐᖁᑏᒃᑯᓂᒃ ᑮᓇᐅᔭᑎᒍᑦ ᓴᐳᒻᒥᒍᓐᓇᒪᑕ ᐱᓇᓱᐊᕐᓂᕆᓚᖓᔭᑦᑎᓂᒃ.
ᑕᕐᖁᑎ ᐆᒻᒪᖁᑎᓕᕆᔩᑦ ᖃᓄᐃᑦᑑᒪᖔᑕ
ᓄᐃᑕᐅᓚᐅᕐᓯᒪᔪᑦ 2017-ᒥ, ᑕᕐᖁᑎ ᓄᓇᕕᒻᒥᐅᓄᑦ ᓇᒻᒥᓂᖁᑎᒋᔭᐅᔪᖅ ᓴᓗᒪᓂᕐᓴᓂᒃ ᐃᑯᒪᐅᑎᓕᐅᕋᓱᐊᕐᓂᒧᑦ ᐱᓇᓱᐊᕐᐸᓕᐊᑦᓱᑎᒃ ᑭᖕᖒᒪᒋᔭᒥᑎᒍᑦ ᓄᐃᑦᓯᒐᓱᐊᕐᓱᑎᒃ ᐃᑯᒪᓕᐅᕈᑎᑦᓴᓂᒃ ᐊᒻᒪᓗ ᑲᖐᓱᐊᒍᑎᒋᔭᖏᑦᑎᒍᑦ ᐊᑐᓂ ᓄᓇᓖᑦ ᓄᓇᕕᒻᒥ, ᐊᒻᒪᓗ ᓄᓇᓕᓐᓂ ᐱᓇᓱᒐᕐᓂᒃ ᓄᐃᒐᓱᐊᕐᓱᑎᒃ. ᑕᕐᖁᑎᒃᑯᑦ ᓯᕗᓕᕐᑐᑦ ᓄᓇᕕᒻᒥ ᐃᑯᒪᐅᑎᓕᐅᕈᑎᓂᒃ ᐊᓯᑦᔨᕙᓪᓕᐊᒐᓱᐊᕐᓂᓂᒃ ᐊᒻᒪᓗ ᐱᐅᓂᕐᓴᑎᒍᑦ ᓯᕗᓂᑦᓴᓕᐅᕈᑎᑦᓴᓂᒃ ᓄᓇᓕᓕᒫᓂ ᐸᕐᓀᓯᒪᕙᓪᓕᐊᓱᑎᒃ ᐊᕙᑎᒧᑦ ᐱᐅᓂᕐᓴᓂᒃ ᐊᒻᒪᓗ ᐃᓄᐃᑦ ᐱᒻᒪᕆᐅᔪᖁᑎᖏᑦ ᓲᓱᒋᔭᐅᑦᓯᐊᓭᓐᓇᑎᓪᓗᒋᑦ ᐱᓇᓱᐊᕋᓱᐊᕐᓱᑎᒃ. www.tarquti.ca
ᑯᐯᒻᒥ ᐃᑯᒪᓐᓂᐊᑎᒃᑯᑦ ᐱᓇᓱᐊᕐᓂᖏᑦ ᓄᓇᓕᐊᕈᕐᓂ ᐃᑯᒪᐅᑎᓄᑦ ᐱᑐᑦᓯᒪᖕᖏᑐᓂᒃ
ᑯᐯᒻᒥ ᐃᑯᒪᓐᓂᐊᑎᒃᑯᑦ ᐊᕙᑏᑦ (20) ᒥᑦᓵᓂᑦᑐᓂᒃ ᐅᕐᓱᐊᓗᒻᒧᑦ ᐃᖏᕐᕋᑎᑕᐅᔪᓂᒃ ᐊᐅᓚᑦᓯᖃᑦᑕᓯᒪᓕᕐᑐᑦ ᐃᑯᒪᐅᑎᖃᕐᑎᒍᑎᒋᔭᒥᓂᒃ ᐅᖓᓯᑦᑎᒥᐅᒍᑦᓱᑎᒃ ᑎᑭᑕᐅᑲᓪᓚᖃᔭᖕᖏᑐᓂᒃ ᓄᓇᓕᓐᓂᒃ ᐃᑯᒪᐅᑎᓄᑦ ᐱᑐᑦᓯᒪᐅᑎᖃᖕᖏᑐᒥᐅᓂᒃ ᐃᑯᒪᖃᕐᑎᓯᑦᓱᑎᒃ (1% ᐳᓴᐅᑉ ᒥᑦᓯᑎᓐᓃᑐᓂᒃ), 43% ᐳᓴᐅᑉ ᐅᖓᑖᓄᑦ ᑲᓵᓖᒥᒃ ᓄᓇᕐᔪᐊᒥᒃ ᓱᒃᑯᓭᔪᒥᒃ ᐳᔪᕐᑐᓂᒃ ᕿᓚᒻᒧᑦ ᐊᑐᕐᓱᑎᒃ. ᑯᐯᒻᒥ ᐃᑯᒪᓐᓂᐊᑎᒃᑯᑦ ᐅᕐᓱᐊᓗᑦᑐᓲᓂᒃ ᐃᑯᒪᓕᐅᕈᑎᐅᓲᓂᒃ ᐊᓯᑦᔨᔭᐅᑎᑦᓯᒍᓐᓇᑐᐊᕐᐸᑕ 80% ᐳᓴᒧᑦ ᐱᐅᓂᕐᓴᓂᒃ ᐃᑯᒪᓕᐅᕈᓐᓇᑎᑦᓯᓚᕿᒐᔭᓕᕐᑐᑦ 2030 ᐊᕐᕌᒍᖓᓂ.
ᐃᑯᒪᓕᐅᕈᑕᐅᒍᓐᓇᑐᓂᒃ ᖃᐅᔨᓴᕐᑏᑦ Nergica-ᑯᑦ ᖃᓄᐃᑦᑑᒪᖔᑕ
ᐃᑯᒪᓕᐅᕈᑕᐅᒍᓐᓇᑐᓂᒃ ᖃᐅᔨᓴᕐᑏᑦ Nergica-ᑯᑦ ᑲᓇᑕᒥᐅᑦᓴᔭᐅᑦᓱᑎᒃ ᖃᐅᔨᓴᕐᕕᒥ ᐱᓇᓱᕝᕕᖃᕐᐳᑦ ᓄᑖᓂᒃ ᐱᕙᓪᓕᐊᑎᑦᓯᒐᓱᐊᕐᓂᐅᒍᒪᔪᓂᒃ ᐃᑯᒪᓕᐅᕐᑎᓂᑯᑦ ᐱᓇᓱᓐᓂᓄᑦ ᖃᐅᔨᓴᕐᓂᑯᑦ, ᐱᓪᓗᑯᒋᐊᓕᓐᓂᒃ ᐃᑲᔪᕐᓯᒐᓱᐊᕈᑎᑦᓴᓂᒃ, ᐱᓪᓗᑯᒋᐊᓕᓐᓂᓗ ᖃᐅᔨᔭᐅᑎᑦᓯᒐᓱᐊᕐᓂᑯᑦ ᐊᒻᒪᓗ ᐱᓪᓗᑯᒋᐊᓕᓐᓂᒃ ᓴᐳᒻᒥᒐᓱᐊᕐᓂᑯᑦ ᑮᓇᐅᔭᓕᐅᕋᓱᐊᕐᑎᓄᑦ ᓄᓇᓕᓐᓄᓗ ᐃᑲᔪᕐᓯᒍᑎᐅᒍᓐᓇᑐᓂᒃ. ᑎᓕᔭᐅᒪᐅᑎᖃᕐᓱᑎᒃ ᐅᑯᓂᖓ: ᓄᑖᓂᒃ ᑲᔪᓯᑎᑕᐅᒐᕈᓐᓇᓗᑎᒃ ᐱᕕᑦᓴᑖᕐᕕᐅᒍᓐᓇᑐᓂᒃ ᐃᑯᒪᓕᐅᕐᓂᑯᑦ ᐱᓇᓱᐊᕐᓂᐅᒍᓐᓇᑐᓂᒃ ᐊᑐᕐᓂᖃᑦᓯᐊᕋᔭᕐᓗᑎᒃ ᐊᑐᕐᑕᐅᕙᓪᓕᐊᒍᓐᓇᑐᓂᒃ ᐊᓄᕆᒧᑦ ᓯᕿᓂᕐᒧᓗ ᐃᑯᒪᓕᐅᕈᓐᓇᐅᑎᐅᒐᔭᕐᑐᓂᒃ ᐊᒻᒪᓗ ᓴᐳᒻᒥᒍᑎᐅᒍᓐᓇᑐᒃ (SMEs-ᒨᓕᖓᔪᓂᒃ) ᓴᐳᒻᒥᒍᑎᑦᓴᓂᒃ. ᖃᐅᔨᒪᔭᐅᒍᑎᖃᖃᑦᑕᓯᒪᔪᑦ ᐊᑦᓯᕋᕐᑕᐅᓯᒪᒍᑎᖃᕐᓱᑎᒃ (TechnoCentre éolient-ᒍᓂᕋᕐᑕᐅᔪᓂᒃ, Nergica-ᑯᑦ ᐊᕐᕌᒍᓂ ᐊᕙᑎᓂ (20-ᓂ) ᐱᓇᓱᐊᕐᓯᒪᓕᕐᑐᑦ ᐃᑯᒪᐅᑎᑦᓴᓕᐅᕈᑎᑦᓭᑦ ᖃᓄᐃᑦᑑᒍᓐᓇᒪᖔᑕ ᖃᐅᔨᓴᕐᑎᐅᓱᑎᒃ. www.nergica.com
– 30 –
ᑐᓴᕋᑦᓴᖁᑎᒋᔭᐅᔪᓂᒃ ᑐᓴᕋᓱᐊᕈᒪᔪᓄᑦ ᐅᖄᕕᐅᒍᓐᓇᑐᖅ ᐊᓪᓚᕕᐅᒍᓐᓇᓱᓂᓘᓐᓃᑦ ᖃᕆᑕᐅᔭᒃᑯᑦ ᐅᓇ:
Audrée Duclos Paré
Director, Marketing and Communications
ᑮᓇᐅᔭᑎᒍᑦ ᓂᐅᕐᕈᓯᒐᓱᐊᕐᓂᒧᑦ ᐊᒻᒪᓗ ᑐᓴᐅᒪᑎᑦᓯᒐᓱᐊᕐᓂᒧᑦ ᑐᑭᒧᐊᑦᑎᓯᒋᔭᐅᔪᖅ
514-569-1405
adpare@nergica.com
