(ᒪᓐᑐᕆᐊᓪ, ᔫᓂ 6, 2022) – ᑕᕐᖁᑎ ᐆᒻᒪᖁᑎᓕᕆᔩᑦ(ᑕᕐᖁᑎ) ᐊᒻᒪᓗ ᑯᐸᐃᒃᑯᑦ ᑰᓐᓂᐊᑎᖏᑦ ᐱᓇᓱᖃᑎᒌᓐᓂᒨᓕᖓᔪᒥᒃ ᐊᖏᖃᑎᒌᒍᑎᒥᒃ ᐊᖏᖃᑎᒌᓐᓂᖂᒃ ᓄᓇᕕᐅᑉ ᓴᓗᒪᔪᒧᑦ ᐆᒻᒪᖁᑎᒨᕐᐸᓕᐊᓂᖓᓄᑦ. ᑖᓐᓇ ᐊᑦᔨᐅᖏᑦᑐᖅ ᐱᓇᓱᖃᑎᒌᓐᓂᖅ ᐱᒻᒪᕆᐅᕗᖅ ᓄᓇᕕᒻᒥᐅᑦ ᐃᓄᖏᓐᓄᑦ, ᐋᕐᕿᓱᐃᕙᓪᓕᐊᔪᓄᑦ ᓴᓇᕐᕈᑎᓂᒃ ᐊᒻᒪᓗ ᐱᒍᓐᓇᓂᕐᒥᓂᒃ ᑭᖕᖒᒪᒋᔭᒥᓂᒃ ᐸᕐᓇᓂᕐᒧᑦ ᓇᒻᒥᓂᕐᒥᓂᒃ ᐊᕙᑎᒧᑦ ᐱᐅᔪᓂᒃ ᐊᑐᕆᐊᓪᓚᕈᓐᓇᑐᓂᒃ ᐆᒻᒪᖁᑎᓅᓕᖓᔪᓂᒃ ᐱᓇᓱᒐᑦᓴᓂᒃ ᓄᓇᕕᒻᒥᐅᑦ ᐃᓪᓕᕆᔭᖏᓐᓂᒃ ᐃᑉᐱᒍᓱᑦᓯᐊᑐᓂᒃ.
ᐱᓇᓱᖃᑎᒌᓐᓂᐅᑉ ᐊᖏᖃᑎᒌᓐᓂᖓᑕ ᐊᑖᒍᑦ, ᑕᕐᖁᑎ ᑯᐸᐃᒃᒥ ᑰᓐᓂᐊᑐᒃᑯᑦ ᐱᐅᒋᓂᕐᐹᕆᑦᓱᒍ ᐱᓇᓱᖃᑎᑐᐊᕐᑖᕆᕚ ᐊᑐᕆᐊᓪᓚᕈᓐᓇᑐᓄᑦ ᐆᒻᒪᖁᑎᓅᓕᖓᔪᓄᑦ ᐱᓇᓱᒐᑦᓴᓕᕆᓂᕐᓄᑦ ᓄᓇᕕᒻᒥ, ᐃᓇᖐᒍᓐᓇᓯᑎᑦᓯᓚᖓᔪᖅ ᓴᓗᒪᔪᒥᒃ ᐆᒻᒪᖁᑎᒥᒃ ᐃᑉᐱᓇᓪᓚᕆᑦᑐᒥᒃ ᐅᕐᓱᐊᓗᒻᒥᒃ ᐊᑐᕐᓱᑎᒃ ᓄᓇᕕᒻᒥ ᐃᑯᒪᓕᐅᕈᑎᖏᓐᓄᑦ. ᓯᕗᓂᑦᓴᖅ ᓱᕐᖁᐃᑎᑦᓯᕗᖅ ᐊᒥᓲᓂᕐᓴᐃᑦ ᐊᑐᕆᐊᓪᓇᕈᓐᓇᑐᑦ ᐆᒻᒪᖁᑎᓕᕆᒍᑏᑦ ᐃᑯᒪᖃᕐᑎᓯᓛᕆᐊᖏᑦ ᓄᓇᕕᒻᒥ ᓄᓇᓕᓐᓂᒃ ᐊᒻᒪᓗ ᓄᓇᓕᓐᓂ ᐊᒻᒪᓗ ᓄᓇᕕᒻᒥ ᐱᓇᓱᒐᑦᓴᓂᒃ ᓄᐃᑦᓯᓛᕆᐊᖓ.
ᑐᓴᕐᑎᓯᒍᑎ ᐅᐱᒍᓲᑕᐅᑦᓱᓂ ᑐᓴᕐᑎᓯᒍᑎᐅᓚᐅᕐᖁᖅ ᑕᕐᖁᑎᐅᑉ ᑐᖕᖓᕕᖁᑎᖃᖃᑎᖏᑦᑕ ᑭᒡᒐᑐᕐᑎᖏᓐᓄᑦ, ᒪᑭᕕᐅᑉ ᐊᖓᔪᕐᖄᖓ ᐱᑕ ᐋᑕᒥ, ᐃᓚᒌᓴᐅᑉ ᐊᖓᔪᕐᖄᖓᑕ ᑐᖓᓕᖓ ᓵᓕ ᑕᕐᕿᐊᐱᒃ, ᐊᒻᒪᓗ ᑯᐸᐃᒃᒥ ᑰᓐᓂᐊᑎᖏᑦᑕ ᐊᖓᔪᕐᖄᖓ ᐊᒻᒪᓗ ᐊᐅᓚᑦᓯᔨᒻᒪᕆᖓ ᓲᕕ ᐳᕈᓱ, ᐱᓇᓱᑦᑎᖏᓪᓗ.
“ᐅᓪᓗᒥ ᖁᕕᐊᓲᑎᖃᕐᖁᒍᑦ ᐱᓇᓱᖃᑎᒌᓐᓂᖓᓂᒃ ᑯᐸᐃᒃ ᑰᓐᓂᐊᑎᖏᑦᑕ ᐊᒻᒪᓗ ᓄᓇᕕᐅᑉ ᐃᓄᖏᑦᑕ,” ᐅᖃᕐᑐᕕᓂᖅ ᐱᑕ ᐋᑕᒥ, ᒪᑭᕕᒃ ᑯᐊᐳᕇᓴᐅᑉ ᐊᖓᔪᕐᖄᖓ. “ᑲᔪᓯᑦᓯᐊᓂᖓ ᐆᒻᒪᖁᑎᓅᕐᐸᓕᐊᓂᐅᑉ ᑕᑎᖃᕐᖁᖅ ᐃᓚᐅᓪᓚᕆᑦᑐᑦ ᓴᓗᒪᔪᒥ- ᐆᒻᒪᖁᑎᓕᕆᔪᓄᑦ ᐃᓚᐅᓂᖏᓐᓂᒃ ᐊᒻᒪᓗ ᓄᓇᓕᑦᑕ, ᓄᓇᕕᐅᓪᓗ ᑎᒥᐅᔪᖏᓐᓂᒃ, ᐃᓚᐅᑎᓪᓗᒋᑦ ᓄᓇᒥᒃ ᑎᒍᒥᐊᕐᑏᑦ. ᐊᓪᓛᑦ, ᐱᓇᓱᖃᑎᑐᐊᖃᕐᓂᕗᑦ ᑯᐸᐃᒃᑯᑦ ᑰᓐᓂᐊᑎᖏᓐᓂᒃ, ᑕᕐᖁᑎ ᐃᓂᑦᓯᐊᖑᓂᕐᐹᒦᒃᑯᒃ ᐱᕙᓪᓕᐊᑎᑦᓯᓂᕐᒧᑦ ᐊᒻᒪᓗ ᐊᑐᐃᓐᓇᐅᑎᑦᓯᓂᕐᒥᒃ ᐱᔪᓐᓇᓚᕆᓐᓂᒥᓂᒃ ᐱᕙᓪᓕᒋᐊᕐᓂᖏᓐᓄᑦ.”
“ᖁᓚᕐᓇᖏᓪᓚᖅ ᑯᐸᐃᒃᑯᑦ ᑰᓐᓂᐊᑎᖏᑦᑕ ᐅᒃᑯᐃᖔᕐᓂᖓ ᐊᒻᒪᓗ ᓈᓚᒍᒪᓂᖓ ᐊᑑᑎᖃᓪᓚᕆᓚᐅᕐᖁᖅ ᐱᔭᕇᕐᑕᐅᓂᖓᓄᑦ ᑖᑦᓱᒪ ᐱᒻᒪᕆᐅᑉ ᐊᖏᖃᑎᒌᒍᑎᐅᑉ. ᓇᑯᕐᒦᓂᖅ ᐊᑦᔨᐅᖏᑦᑐᖅ ᓲᕕᒨᓕᖓᕗᖅ ᐱᓇᓱᑦᑎᖏᓐᓄᓗ ᐅᒃᑯᐃᖔᕐᑐᒧᑦ ᐅᖄᖃᑎᒌᓐᓂᒧᑦ ᐊᒻᒪᓗ ᐱᓇᓱᖃᑎᖃᕐᓂᒧᑦ ᑕᕐᖁᑎᒥᒃ ᑕᒪᑦᓱᒪᓂ ᐱᔭᕆᐊᑐᔪᒥ ᐱᕙᓪᓕᐊᓂᕐᒥ, ”ᐅᖃᓚᐅᕐᑯᖅ ᒥᐊᔨ ᔪᐊᓇᓯ, ᐃᓚᒌᓴᐅᑉ ᐊᖓᔪᕐᖄᖓ.
ᑖᓐᓇ ᖃᓄᕐᑑᓂᖅ ᐃᑲᔪᕐᑐᐃᕗᖅ ᑯᐸᐃᒃᑯᑦ ᑰᓐᓂᐊᑎᖏᑦᑕ ᐋᕐᕿᓯᒪᐅᑎᑦᓴᖓᓂᒃ ᐊᓯᑦᔩᓂᕐᒧᑦ ᓄᓇᓕᓐᓂ ᐃᑯᒪᓕᐅᕈᑎᖏᓐᓂᒃ 80%-ᓂᒃ ᑎᑭᐅᑎᑎᓗᒋᑦ ᐊᑐᕆᐊᓪᓚᕈᓐᓇᑐᓂᒃ ᐃᑯᒪᖃᕐᑎᓯᓂᕐᒧᑦ 2030 ᑎᑭᓪᓗᒍ.
“ᑯᐸᐃᒃᑯᑦ ᑰᓐᓂᐊᑎᖏᓐᓂᑦ ᐱᑎᓪᓗᒍ, ᓇᓗᓇᐃᕐᓯᒍᒪᕗᖓ ᑐᓂᒪᓂᖓᓂᒃ, ᑲᐃᓪᓗᑐᐃᓂᖓᓂᒃ ᐊᒻᒪᓗ ᑐᑭᑖᕐᓯᒪᓂᖓᓂᒃ ᐱᓇᓱᖃᑎᑦᑕ, ᑕᕐᖁᑎᐅᑉ, ᐊᒻᒪᓗ ᐃᑉᐱᒍᓱᒍᒪᔪᓄᑦ ᐊᑐᕆᐊᓪᓚᕈᓐᓇᑐᑦ ᐆᒻᒪᖁᑎᓅᓕᖓᔪᑦ ᐱᓇᓱᒐᑦᓴᐃᑦ ᓄᓇᕕᒻᒥ ᐱᕙᓪᓕᐊᑎᑕᐅᓂᖏᓐᓂᒃ ᐊᒻᒪᓗ ᓇᒻᒥᓂᕆᔭᐅᓕᖏᓐᓂᒃ ᐊᐅᓚᑕᐅᓂᖏᓐᓂᒃ ᓄᓇᓕᓐᓄᑦ ᐊᒻᒪᓗ ᓄᓇᕕᒻᒥ ᓄᓇᓕᓐᓄᑦ, ”ᐅᖃᕐᑐᕕᓂᖅ ᓲᕕ ᐳᕈᓱ, ᐊᖓᔪᕐᖄᖅ ᐊᒻᒪᓗ ᐊᐅᓚᑦᓯᔨᒻᒪᕆ ᑯᐸᐃᒃᑯᑦ ᑰᓐᓂᐊᑎᖏᓐᓄᑦ. “ᑖᓐᓇ ᐊᖏᖃᑎᒌᒍᑎ ᓇᓗᓇᐃᕐᓯᒍᑎᓪᓚᕆᐅᕗᖅ ᐸᕐᓇᓂᑦᑎᓄᑦ ᐃᑲᔪᕐᓯᒪᓛᕐᓂᑎᓐᓂᒃ ᓄᓇᖃᕐᖄᓯᒪᔪᑦ ᓄᓇᓕᖏᓐᓂᒃ ᑲᒪᒍᒪᔪᓂᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᑦᓴᓂᒃ, ᐊᑐᐃᓐᓇᐅᑎᑦᓯᓛᕐᓱᑕᓗ ᐃᑲᔪᕐᓂᑎᓐᓂᒃ ᐊᒻᒪᓗ ᐱᒍᓐᓇᓚᕆᓐᓂᑎᓐᓂᒃ ᐊᕐᖁᑎᖓᑕ ᐱᕙᓪᓕᐊᓂᖓᓂ. ᐅᑉᐱᖁᒍᑦ ᐆᒻᒪᖁᑎᓅᕐᐸᓕᐊᓂᖅ ᒫᓐᓇ ᐃᑯᒪᓕᐅᕈᑎᓂᑦ ᐊᑐᓕᕐᑎᑕᐅᒍᓐᓇᒪᑦ ᐃᓄᓐᓂᑦ, ᐃᓄᓐᓄᑦ ᑭᓯᐊᓂ ᓱᕐᕋᑕᐅᓂᕐᐹᓄᑦ ᑖᑦᓱᒧᖓ,”. ᐳᕈᓲᐃᓚᐃᒋᐊᕐᑐᖅ.
ᑕᕐᖁᑎ ᐆᒻᒪᖁᑎᓕᕆᔩᑦ ᒥᑦᓵᓄᑦ
ᓄᐃᑕᕕᓂᖅ 2017-ᒥ, ᑕᕐᖁᑎ ᓄᓇᕕᒻᒥᐅᓄᑦ ᓇᒻᒥᓂᕆᔭᐅᑦᓱᓂ ᖄᖏᕐᓂᑯᓕᐅᕋᓱᑦᑎ ᐱᓇᓱᓲᖅ ᓴᓗᒪᔪᓂᒃ ᐆᒻᒪᖁᑎᓅᓕᖓᔪᓂᒃ ᐱᓇᓱᒐᑦᓴᓂᒃ ᐋᕐᕿᓱᕐᓯᒪᔪᓂᒃ ᑭᖕᖒᒪᒋᔭᖏᑦ ᐱᒍᒪᔭᖏᓪᓗ ᒪᓕᑦᓱᒋᑦ ᐊᑐᓂ ᓄᓇᕕᒻᒥᐅᑦ ᓄᓇᓕᖏᑦᑕ ᖃᐅᔨᔭᐅᑎᑦᓯᒐᓱᑦᓱᓂ ᓄᓇᓕᓐᓂ ᐱᓇᓱᒐᑦᓴᓕᐅᕐᓂᒥᒃ. ᑕᕐᖁᑎ ᓯᕗᓕᕐᖁᖅ ᓄᓇᕕᐅᑉ ᐆᒻᒪᖁᑎᓅᕐᐸᓕᐊᓂᖓᓂᒃ ᐊᒻᒪᓗ ᐸᕐᓇᓱᓂ ᓯᕗᓂᑦᓴᓯᐊᖑᓂᕐᓴᒥᒃ ᓄᓇᕕᒻᒧᑦ, ᐊᕙᑎᒧᑦ ᐱᐅᔪᒥᒃ ᐊᒻᒪᓗ ᑲᒪᑦᓯᐊᓱᓂ ᐃᓄᐃᑦ ᐃᓪᓕᕆᔭᖏᓐᓂᒃ.
ᑯᐸᐃᒃᑯᑦ ᑰᓐᓂᐊᑎᖏᑦᑕ ᓄᓇᓕᓐᓂ ᐃᑯᒪᓕᐅᕈᑎᖏᑦᑕ ᒥᑦᓵᓄᑦ
ᑯᐸᐃᒃᑯᑦ ᑰᓐᓂᐊᑎᖏᑦ ᐊᐅᓚᑦᓯᕗᑦ 20-ᒐᓚᓐᓂᒃ ᐅᓇᕐᑐᒧᑦ ᐃᑯᒪᓕᐅᕈᑏᑦ ᐃᑯᒪᓕᐅᕐᕕᖏᓐᓂᒃ ᐃᑯᒪᖃᕐᑎᓯᑦᓱᑎᒃ ᖃᓂᖕᖏᑐᓂᒃ ᓄᓇᓕᓐᓂᒃ ᐱᑐᑦᑕᐅᖃᔭᖕᖏᑐᓂᒃ ᐃᑯᒪᓕᐅᕈᑎᖓᓄᑦ. ᑖᒃᑯᐊ ᐱᓇᓱᕝᕖᑦ ᒥᑭᔪᐸᐅᔮᓗᒻᒥᒃ ᐃᑯᒪᓕᐅᕐᓂᒥᒃ ᐃᑯᒪᓕᐅᕐᑕᒥᒃ ᑯᐸᐃᒃᑯᑦ ᑰᓐᓂᐊᑎᖏᓐᓄᑦ (1%-ᒥᒃᒥᑭᓂᕐᓴᖅ), ᐱᑦᔪᑎᐅᕗᑦ 43% ᒐᓚᒻᒥᒃ ᐅᕐᖂᓯᕙᓪᓕᐊᑎᑦᓯᓂᕐᒧᑦ ᓄᓇᕐᔪᐊᒥᒃ ᐳᔪᕐᓗᒥᒃ. ᑯᐸᐃᒃ ᑰᓐᓂᐊᑎᖏᑦ ᑐᕌᕐᖁᑦ ᐊᓯᑦᔩᓂᕐᒥᒃ ᓄᓇᓖᑦ ᐃᑯᒪᓕᐅᕈᑎᖏᓐᓂᒃ ᑎᑭᐅᑎᓂᕐᒧᑦ 80%-ᒥᒃ ᐊᑐᕆᐊᓪᓚᕈᓐᓇᑐᒥᒃ ᐃᑯᒪᖃᕐᑎᓯᓂᕐᒥᒃ 2030 ᑎᑭᓪᓗᒍ.
-30-
ᐊᐱᕐᓱᐃᒍᒪᓂᕐᓄᑦ ᐅᕝᕙᓘᓐᓃᑦ ᑐᑭᓯᒋᐊᓪᓛᓂᕐᓄᑦ, ᖃᐅᔨᒋᐊᕐᕕᒋᒍᒃ:
ᔮᓇᓯ ᑯᔩ
ᑐᓴᕈᑎᓕᕆᓂᕐᓂᒃ ᐊᒻᒪᓗ ᓄᓇᓖ ᐃᓚᐅᑎᑕᐅᓂᖏᓐᓂᒃ ᐊᐅᓚᑦᓯᔨ
ᑕᕐᖁᑎ ᐆᒻᒪᖁᑎᓕᕆᔩᑦ
janice.grey@tarquti.ca
514 707-9477
ᕙᕌᓐᓯᔅ ᓚᐱ
ᑭᒡᒐᑐᐃᑦᓱᓂ ᐅᖄᔨ
ᑯᐸᐃᒃ ᑰᓐᓂᐊᑎᖏᑦ
labbe.francis@hydroquebec.com
514 268-1394
