ᑕᕐᖁᑎᐅᑉ ᐱᓇᓱᖃᑎᒌᑦᑐᖁᑎᖏᑦ ᐅᐱᒍᓱᑉᐳᑦ ᑐᓴᕐᑕᐅᑎᑦᓯᒍᑎᖃᕆᐊᒥᒃ ᐱᓇᓱᑦᑎᑖᕆᐊᒥᓂᒃ ᔮᔅᑕᓐ ᐳᓘᑕᒥᒃ, ᐃᑯᒪᐅᑎᑐᕐᑐᓂᒃ ᓴᓇᒻᒪᓕᐅᕐᑎᐅᓱᓂ ᐱᓪᓗᑯᒋᐊᓕᓕᕆᒍᓐᓇᑐᒥᒃ ᓄᑕᐅᓯᓕᕈᓐᓇᓱᑎᒃ ᐆᒻᒪᖁᑎᑦᓴᔭᓂᒃ ᓄᓇᕕᒻᒥ ᐱᓇᓱᑎᐅᓚᖓᑦᓱᓂ ᐱᓇᓱᑦᑕᐅᔪᒃ ᐱᕙᓪᓕᐊᑎᑦᓯᕕᒻᒧᑦ, ᑐᑭᒧᐊᑦᑎᓯᔨᐅᓗᓂ. ᖃᐅᔨᒪᔭᐅᑦᓯᐊᑐᖅ ᓇᓂᓕᒫᖅ ᐱᓇᓱᑦᑐᓄᑦ ᓄᑕᐅᓯᓕᕈᓐᓇᑐᓂᒃ ᐆᒻᒪᖁᑎᑦᓴᓂᒃ ᐱᓇᓱᒐᖃᕐᕕᐅᔪᓂᓕ, ᐳᓘᑕ ᑎᓕᔭᐅᒪᒍᑎᖃᓚᖓᕗᖅ ᓯᕗᓕᕐᓂᒥᒃ ᐱᓇᓱᑦᑕᐅᒍᑎᖏᓐᓂᒃ, ᐱᓇᓱᑦᑕᐅᒍᑎᑦᓴᔭᖏᓐᓂᒃ, ᓇᓗᓀᕆᖃᑦᑕᓂᖅ, ᑲᔪᓯᑎᑦᓯᖃᑦᑕᓂᖅ, ᐊᒻᒪᓗ ᐊᖏᕐᑎᐅᓱᓂ ᓇᑉᐸᑎᕐᑕᐅᒍᑎᖏᓐᓂ ᓴᓗᒪᔪᒥᒃ ᐆᒻᒪᖁᑎᑦᓴᓕᐅᕐᓂᓂᒃ ᐱᓇᓱᒍᑎᐅᔪᓂ ᐊᒥᓱᐃᓂ ᓄᓇᕕᐅᑉ ᓄᓇᓕᖏᓐᓂ. ᑎᓕᔭᐅᒪᒍᑎᑖᕐᓂᖓ ᑲᔪᓯᑎᑕᐅᓂᖃᓚᐅᕐᐳᖅ ᓯᑉᑎᒻᐱᕆ 7-ᖑᑎᓪᓗᒍ.
ᐊᕐᕌᒍᐃᑦ 10 ᐅᖓᑖᓄᑦ ᐆᒻᒪᖁᑎᑦᓴᓕᕆᓂᕐᓂᒃ ᐱᓇᓱᒐᖃᕐᕕᓂ ᐱᓇᓱᓕᓂᐅᓕᕐᓱᓂ, ᐳᓘᑕᐅᑉ ᐱᓇᓱᖃᑦᑕᓯᒪᔭᖏᑦ ᑕᑯᑦᓱᒋᑦ ᐱᓇᓱᑦᓯᑎᐊᓘᒋᐊᖓ ᑕᑯᑦᓴᐅᔪᑦ ᐊᒥᓱᓂᓪᓗ ᖃᐅᔨᒪᔭᖃᑦᓯᐊᓱᓂ. ᐊᒥᓲᖕᖏᑐᓄᑦ ᓴᓇᒻᒪᓕᐅᕐᑎᓴᔭᓄᑦ ᐃᓚᒋᔭᐅᔪᖅ ᐱᒍᓐᓇᓂᖃᑦᓯᐊᑐᓄᑦ ᐊᓄᕆᒥᒃ ᐆᒻᒪᖁᑎᑦᓴᓕᐅᕆᐊᒥᒃ ᐱᓇᓱᑦᒃᑕᖃᕐᓂᓂᒃ ᓄᓇᕕᒻᒥ, ᓯᕗᓕᕐᓯᒪᒐᒥ ᑲᔪᓯᓂᖃᑦᓯᐊᑑᓐᓂᒃ ᒪᕐᕈᐃᓂᒃ ᐊᓄᕆᒥᒃ ᑫᕙᑦᑐᐊᓗᑦᑎᒍᑦ ᐆᒻᒪᖁᑎᑦᓴᓕᐅᕐᓃᓂᒃ ᓄᓇᒥ ᐅᔭᕋᓐᓂᐊᕕᐅᔪᒥ, ᐊᑕᐅᑦᓯᑯᑦ ᐊᕗᖓᐅᓖᑦᓱᓂ ᓂᕆᐅᕝᕕᐅᒍᑎᒥᒃ ᐊᒻᒪᓗ ᐱᔭᕇᑲᐱᓐᓂᓴᐅᑦᓱᓂ ᑮᓇᐅᔭᕐᑐᓗᐊᖕᖏᓂᕐᓴᐅᓱᓂᓗ ᓂᕆᐅᒋᔭᐅᔪᕕᓂᕐᓂᑦ. ᐊᕐᕌᒍᓂ ᖁᓕᓂ ᐊᓂᒍᕐᑐᓂ, ᔭᔅᑕᓐ ᐃᒻᒥᓂᒃ ᓲᓱᒋᔭᑦᓴᓯᐊᕈᕐᑎᓯᒪᕗᖅ ᐱᒐᓱᒍᓐᓇᓂᖃᕋᒥ ᐱᓇᓱᑦᑕᖃᕐᓂᒥᒃ ᐊᒥᓱᐃᓂᒃ ᐱᔪᓐᓇᐅᑎᖃᕈᑎᐅᒋᐊᓕᓐᓂᒃ ᐊᒻᒪᓗ ᐃᓗᕐᖁᓯᖃᑎᒌᖕᖏᑐᓂᒃ ᐱᓇᓱᖃᑎᒌᑦᑐᖁᑎᖃᕐᓂᒥᒃ, ᓄᐃᑦᓯᕙᓪᓕᐊᒍᓐᓇᓂᕐᒥᒍᓪᓗ ᐊᑑᑎᖃᑦᓯᐊᑐᓂᒃ ᐱᓇᓱᒍᑎᑦᓴᓂᒃ ᐃᓕᖓᓂᖃᓪᓗᑯᕐᑐᓂᒃ ᓄᓇᐅᑉ ᐊᕙᑎᖓᑕ ᖃᓄᐃᑦᑐᓂᖓᓄᑦ ᐱᓇᓱᑦᑕᒥᓂᒃ ᐃᖏᕐᕋᑎᑦᓯᕕᒋᓲᒥᓂᒃ.
“ᔭᔅᑕᓐ ᐃᓚᐅᓯᓂᕆᓚᐅᔪᔭᖓ ᑕᕐᖁᑎᒃᑯᑦ ᐱᓇᓱᖃᑎᒌᑦᑐᖁᑎᖏᓐᓄᑦ ᐃᓘᓐᓇᑎᓐᓄᑦ ᓄᓇᕕᐅᑉ ᓄᓇᓕᓕᒫᖏᓐᓄᑦ ᑐᓴᕋᑦᓴᓯᐊᖑᕗᖅ, ᐱᕙᓪᓕᑕᐅᓂᖃᓛᕋᒥᒃ ᐱᔪᓐᓇᓂᖏᓐᓄᑦ ᓄᐃᑎᕆᐊᓕᑎᒍᑦ ᓴᓇᔭᖃᕐᓂᑯᓪᓗ ᓴᓗᒪᔪᓂᒃ ᐆᒻᒪᖁᑎᑦᓴᓂᒃ ᓄᓇᓂ ᐅᖓᓯᑦᑕᕇᓂ. ᐳᓘᑕᐅᑉ ᐊᑦᑕᓀᑦᑐᓂᖓᓗ, ᓴᐱᓕᕐᓯᕇᑦᑐᓂᓗ, ᓱᖏᐅᑎᑦᓴᐅᑎᒋᒍᐊᕐᑑᓂᖓ, ᐊᒻᒪᓗ ᐃᑉᐱᒋᔭᑦᓯᐊᓂᖓ ᐱᒻᒪᕆᐅᓗᑎᒃ ᐃᑲᔪᕐᓯᓂᖃᓚᖓᕗᑦ ᐱᓇᓱᒐᖃᕐᕕᒥᒃ, ᐊᑑᑎᖃᑦᑕᑐᒥᒃ ᑲᔪᓯᓂᖃᑦᓯᐊᒪᕆᓐᓂᒥᒃ ᐊᕐᕌᒍᖅ ᐱᒋᐊᓕᓚᐅᔪᒻᒪᓂᑦ ᑎᒃᑯᐊᑕᐅᓂᖃᓚᐅᕐᑎᓗᒋᓪᓗ ᐋᓐᑎᓗ ᔮᓇᔅᓗ, ” ᐅᖃᕐᑐᖅ ᑕᕐᑯᑎᐅᑉ ᑲᒪᔨᒻᒪᕆᖓ, ᔫᐃ ᓛᓐᓯ.
ᐃᕿᐊᓱᐊᒐᓂ ᐃᑲᔪᕐᓯᓂᖃᕈᒪᑦᓯᐊᓱᓂᓗ ᐃᓕᖓᔪᓂᒃ ᐊᑦᔨᒌᑦᑎᖏᑦᑑᓕᖓᔪᓂᒃ ᓴᓗᒪᓂᕐᓴᓂᓪᓗ ᐆᒻᒪᖁᑎᖃᕐᓂᓴᓄᑦ ᐱᓗᐊᕐᑐᒥᓗ ᐆᒻᒪᖁᑎᑦᓴᐅᔪᑦ ᐊᓯᑦᔨᕙᓪᓕᓂᖏᓐᓄᑦ ᓄᓇᕕᒻᒥ, ᐳᓘᑕᐅᑉ ᐱᔪᓐᓇᓯᐊᕐᑕᖏᑦ ᐃᓚᖃᕆᕗᑦ ᐃᓄᓐᓂᒃ ᐅᖃᖃᑎᒌᖃᑎᖃᑦᓯᐊᕈᓐᓇᓂᖏᓐᓂᒃ ᐊᒻᒪᓗ ᖁᕕᐊᓇᕐᓯᑎᑦᓯᖃᑦᑕᖁᓐᓇᓂᕐᓂᒃ. ᐃᓚᐅᓯᒪᔪᑦ ᐊᒥᓱᑲᓪᓚᓄᑦ ᑲᑎᖕᖓᓂᕐᔪᐊᓄᑦ ᑲᑎᒪᓂᐊᕈᓯᕐᓄᓗ ᐱᑦᔪᑎᓕᓐᓄᑦ ᓵᖕᖓᔭᑦᓴᐅᓲᓂᒃ ᐃᓕᖓᑦᓱᑎᒃ ᑲᔪᓯᑎᑦᓯᓂᕐᓄᑦ ᒥᑭᓂᕐᓴᓂᒃ ᐃᑯᒪᐅᑎᓕᐅᕈᑎᓂᒃ ᐱᓇᓱᑦᑕᐅᔪᓄᑦ. ᑕᒪᒃᑯᐊ ᐃᓚᒋᔭᐅᒻᒥᔪᑦ ᐱᔪᓐᓇᐅᑎᓕᑦᓯᐅᑎᒥᒃ ᐱᓇᓱᒐᕐᒥᒍᑦ ᐱᔭᖃᕈᑎᒋᖃᑦᑕᓯᒪᔭᖏᓐᓄᑦ, ᑲᔪᓯᕗᕐᓗ ᐊᖏᔪᑲᓪᓚᒥᒃ ᓇᓗᓀᕐᑕᐅᒍᑎᖃᕐᐸᓂᖏᑦ ᐱᔪᓐᓇᑕᖃᑦᓯᐊᕈᑎᒥ ᐊᑦᔨᓕᐅᕆᓂᕐᒥᒃ.
ᑲᑐᑦᔮᖃᕐᓗᑕ, ᓱᕐᖁᐃᑐᒥᒃ ᓄᓇᐅᑉ ᐊᕙᑎᖓᓂᒃ ᓱᒃᑯᑎᕆᖕᖏᓂᕐᓴᒥᒃ ᓯᕗᓂᑦᓴᓕᐅᓕᕐᑕ ᓄᓇᕕᐅᑉ ᓄᓇᓕᖏᓐᓄᑦ.
ᓴᕐᕿᑎᑕᐅᓂᖃᓚᐅᕐᓯᒪᑦᓱᓂ 2017-ᒥ, ᑕᕐᖁᑎ ᓄᓇᕕᒻᒥᐅᓄᑦ-ᓇᒻᒥᓂᕆᔭᐅᑦᓱᓂ ᐱᓇᓱᒐᖃᕐᕕᐅᕗᖅ ᐱᓇᓱᒍᑎᖃᓱᖑᑦᓱᓂ ᓴᓗᒪᔪᓂᒃ ᐆᒻᒪᖁᑎᑦᓴᓕᐅᕐᓂᓂᒃ ᐋᕐᕿᓱᕐᓯᒪᔪᓂᒃ ᐃᓄᑐᐃᓐᓀᑦ ᓄᓇᓕᖏᑕ ᑮᖕᖒᒪᑦᓯᒍᑎᖏᓐᓄᓗ ᐅᓇᒻᒥᓱᒍᑎᖏᓐᓄᓗ ᓄᓇᖁᑎᒥᓐᓂ. ᐱᓇᓱᑉᐸᑕᒥᒍᑦ, ᖁᕝᕙᑎᕆᓂᖃᕐᐸᑭᕗᖅ ᓄᓇᓕᓐᓂ ᐱᓇᓱᒐᐅᒍᓐᓇᑐᓂᒃ. ᑕᕐᖁᑎ ᓯᕗᓕᕐᐳᖅ ᓄᓇᕕᐅᑉ ᐆᒻᒪᖁᑎᑦᓴᑎᒍᑦ ᐊᓯᑦᔨᕙᓪᓕᐊᒍᑎᖏᓐᓂᒃ ᐱᕙᓪᓕᐊᑎᓯᒍᑎᖃᕐᒥᓱᓂᓗ ᐱᐅᓂᕐᓴᒥᒃ ᓯᕗᓂᑦᓴᖃᕐᓂᓴᖓᓂᒃ ᓄᓇᐅᑉ, ᐱᓇᓱᒍᑎᖃᕐᓱᓂ ᓲᓱᒋᔭᖃᑦᓯᐊᑐᒥ ᓄᓇᐅᑉ ᐊᕙᑎᖓᓂᓪᓗ ᐃᓄᑐᐃᓐᓀᓗ ᐃᓪᓕᓇᕐᑐᖁᑎᖏᓐᓂᒃ.
